Shah thok pisa online uwei u rangbah bad kiwei ki jingjia

Shillong, Rymphang 15: Uwei u nongshong shnong jong ka nongbah Shillong u la phah ka jingujor ba ha ka 11 tarik mynta u bnai, ki runar bym lah ban ithuh ki la thok ïa u ka pisa kumba T. 99,867/- online.
Ha kawei pat ka jingjia ki pulit ki la ïathuh ba u Rapbor Kharnaior u la phah ka jingujor ba ha ka 11 tarik mynta u bnai ha ka por 7.30 mynmiet, ki runar bym lah ban ithuh ki la tuh ïa kawei ka mobile phone bad kawei ka printer kaba la long trai da u Vincent Pakynteiñ, napoh ka kali jong u ha Mawlai Nongpdeng, Shillong.
Shuh shuh ki pulit ki la ïathuh ba kawei ka longkmie kaba sah ha Shillong ka la phah ka jingujor ba ha ka 1 tarik mynta u bnai ha ka por kumba 4 janmied, uwei u briew u la thok pisa ïa ka kaba la long kumba T. 10,000/- lyngba ka phone.
Ka khubor ba la ïoh na ki pulit la ïathuh ba u Dondor Rapmai u la phah ka jingujor ba hapdeng ka janmied jong ka 10 & 11 tarik mynta u bnai, ki runar bym lah ban ithuh ki la tuh ïa ka music system kaba shongdor T. 8,000/- napoh ka kali jong u hapoh ka shnong Lad Wahkdait, Laitkor, Shillong.