Shillong, Rymphang 14: U Nongïalam ka BJP bad u MDC ka Tura u Bernard N Marak ha ka sngi Palei u la ong ba ka burom bad jingdon bor jong ki Autonomous District Councils (ADCs) ha Meghalaya kan wanphai biang tang lada ka BJP ka wan ha ka bor.
“Ka BJP ka don jingthmu ban pynkhlaiñ ïa ki kam shnong kam thaw lyngba ki bor pynïaid shnong lyngba ki nongïalam kiba la shah jied. Ka BJP kam dei satia kaba pyrshah ïa ki riewlum ne Christian, hynrei ka dei ka parti jong ki paidbah. Ki liang pyrshah kum ka Congress bad kiwei ki parti ki pynslem ïa ka jingïakren sngewthuh jingmut mynta la kumba 10 snem khamtam eh ha ka por ba dang synshar ka Congress. Ki la pynjem rngiew ruh wat ïa ki Autonomous District Council ha kine ki snem ba la leit,” ong u Marak.
U la ong ba ki rukom treikam jong ki Council ki la long kiba kyrpang bad kiba thmu ban ai ka bor kaba laitluid ne Autonomous sha ki riewlum kane ka thaiñ shatei lammihngi. Ki longshwa manshwa jong ngi kim ju ai lad ïa ki bor nongwei ba kin wan leh donbor ha kane ka thaiñ bad ka jaitbynriew kaba la shai.
“Ïa ki hok jong ki riewlum la pyntlot hadien ba la synshar ka Congress ha ka jylla. Dei ma ki, kiba wanrah ïa ka Municipality ha kine ki Hill District kaba pynkheiñ ïa ka article 243ZC jong ka riti synshar jong ka ri India. Dei maki kiba bat ïa kiba bun ki tnat kiba kongsan, kum ka Forest Revenue bad ki jingsam bynta ïa ki khajna sha ka jylla bad ki la pyntlot ïa ki Council ha ki snem ba la leit noh,” ong u Marak.
“Ka jingïasoi jingmynjur jong ki Garo kaba la ïasoi ha ka snem 2014 ha Delhi ha ka jingdonlang u Union Home Minister u Rajnath Singh bad u Minister of State (Home) u Kiren Rijiju ka la wanrah ka jingkylla namar ba ka BJP ka la shim ïa kane ka sienjam ban pynbeit ïa kane ka kam mynta la bun phew tylli ki snem ban pynkhlaiñ ïa ki Autonomous District Council ha ki jaka ka Sixth Scheduled. Wat haduh mynta ki bor jong ka jylla ki dang pynslem ban pyntreikam ïa kane ka jingïamynjur,” u la ong da kaba kam ruh ba ka BJP kan pynthikna ba kane ka jingïamynjur kan treikam ha ki 3 tylli ki District Council ha Meghalaya.
