Ba pyrkhing ki aiñ wat u heh spah tam ha ka ri ruh um lah thied jaka ha Meghalaya: Dy CM

Shillong, Rymphang 14 : U President ka NPP-Meghalaya bad Symbud Myntri Rangbah Bah Prestone Tynsong ula ong ba wat u briew ba hehspah tam hapoh ka Ri India, un ym lah ban thied jaka ha Meghalaya.
“Wat u Hehspah tam kum u Mukesh Ambani ruh un ym lah ban thied jaka ha Meghalaya namar ka jingdon jong ki Autonomous District Council (ADC) bad ka Mghalaya Land Transfer Act, kiba la thaw bad pynwandur da ki Longshuwa” ong u Bah Prestone haba kren ha ka rynsan ïalap elekshon ha Nongshken ha ka sngi Palei ban pan jingkyrshan ïa ka MDC kong Grace Mary Kharpuri.
“Namar kata, kam don daw ïa ki paidbah ba kin sheptieng namar ngi don ïa ki ADC bad ka Land Transfer Act” ula ong haba bynrap ‘Ka Land Act bala mynjur da ka KHADC ka dei kaba khlain bad ba treikam bha ban nang pynkhlaiñ ïa ka hok jong ki paid trai ri trai muluk halor ka khyndew ka shyiap”.
Ula pyntip ruh ba u Lat ka Jylla ula dep ban ai jingmynjur ïa palat hynniew tylli ki bill bala mynjur da ka EC ba ïalam ka NPP ha KHADC bad kane ka dei ka jingjop kaba khraw bha.
Halor ki jingkynnoh bamsap, u Bah Prestone ula ong “Ki paidbah kim dei ban ngeit ïa kine ki jingkynnoh ba khlem nongrim namar ka Sorkar kam lah ban pynlut wat tang shi tyngka khlem da pynbiang ïa ki jingkheiñ jingdiah. Ngi don ïa ka kaiphod CAG, kaba lah ban phah ïa ki riew bamsap wat sha along ruh”.
Ula kyntu ïa ki paidbah ba kin vote ïa ka kong Grace ban pynthikna ïa ka roi ka par ha baroh ki liang ha ka constituency.