Dawa ki nongkitkam ïa ka tnad ïalehkai bad MSOA ban ithuh noh ïa ka jingïalehkai Jeet Kune Do

Shillong, Jylliew 13: Ki dkhot bad nongkitkam ka Meghalaya Jeet Kune Do Association (MJKA) ka dawa ïa ka sorkar jylla lyngba ka tnad sport bad na ka MSOA ban ithuh noh kham kloi ïa katei katei ka jait jingïalehkai hapoh ka jylla khnang ban dup lah ban kyntiew ïa ki riew donsap ha katei ka jait jingïalehkai.
Ïa ka Meghalaya Jeet Kune Do Association (MJKA) kaba la seng nyngkong eh ha Meghalaya naduh u snem 2012 ka la dep ban pynlong haduh 6 tylli ki State Level Jeet Kune Do Championship, hynrei wat la ka la dep pynithuh sha ka tnat sport ka sorkar kam pat ai kano ka jingïarap haduh mynta.
Ka MJKA kan sa pynlong ïa ka 7th Jeet Kune Do State Level Championship ha ka taïew ba khatduh jong u Naitung 2022. Lah ban pynkynmaw hangne ba ki khynnah ïalehkai Jeet Kune Do ki la lah ban khur shibun ki takma ha ki snem ba la dep ym tang napoh ka jylla hynrei na ki National bad International Championship bapher bapher. Ha ka 12 tarik Jylliew 2022 ha ka jingïashim bynta sha ka 9th Northeast Jeet Kune Do Championship kaba la long ha Cotton College Indoor Stadium Guwahati Assam ki dkhot ka MJKA ki la ïoh ban khur haduh 26 tylli ki takma Ksiar 14 tylli ki takma Rupa bad 2 tylli ki takma Rnong
Ka Jeet Kune Do ka dei ka Martial arts kaba la shem da u Bruce Lee ha ki snem 70 khlieh bad ha Meghalaya la wanrah nyngkong eh da u Bah Donny R Ranee ha u snem 2012. Ïa ka JEET Kune Do la ithuh da ka SGFI bad mynta ka la rung ha ka TAFISA nalor kiwei kiwei.
“Ngi dawa ba ka Sorkar bad MSOA ki dei ban ithuh noh kham kloi ïa kane ka jait jingïalehkai ha poh ka jylla ban dup lah ban kyntiew ïa ki riew donsap na ka jylla. Ka MJKA ka buh ruh ka jingkyrpad na u Bah Banteidor Lyngdoh Myntri sport ban pynkup burom lem ïa ki khynnah ïalehkai ka MJKA ki ba la jop ha ki jingïalehkai International bad rah burom ïa ka Meghalaya naduh ki snem 2016- 17 ter ter ki bym shem la ïoh burom ne jingithuh naduh ba ki la jop,” ong ki nongïalam ka MJKA.
Ka MJKA ka ai ka jingkhublei kitbok kitrwiang ïa baroh ki nongjop takma ha ka 9th Northeast Jeet Kune Do kaba dang shu dep long ha ka 12/6/2022 ha Cotton college Guwahati Assam.