Shillong, Rymphang 11: Ka sorkar jylla ka la siew ka bailutksan ka pisa T. 5 lak sha ki bahaïing hasem jong u (L) Wanlangki Dkhar, u khynnah uba la khlad noh ha Shillong Civil Hospital ha ka 9 tarik u Lber, 2020.
Secretary ka Meghalaya Human Rights Commission (MHRC) ha ka sngi baar la pyntip ba ka Commission, ha ka hukum jong ka, kaba 6 tarik u Nohprah, 2024, la mynjur ïa kane ka jingsiew sha ki bahaïing hasem jong u (L) Wanlangki Dkhar, u khynnah uba la khlad noh ha Civil Hospital, Shillong ha ka 9 tarik Lber, 2020 ka pisa T. 5,00,000 lak bad ïa kane dei ban siew da ka tnat Health and Family Welfare, ka sorkar Meghalaya.
Ka Director of Health Services (MI) lyngba ka shithi kaba 7 tarik u Rymphang, 2025, ka la pyntip sha ka Commission ba ïa kane ka pisa la siew da ka cheque sha ka kong Modly Dkhar, kaba dei ka kmie jong utei u khynnah ha ka jingdonlang ki ophisar ka tnat ka Koit ka Khiah bad ki ophisar jong ka MHRC.
