Shillong, Rymphang 10: Ka ding kaba klang bha ka la jia ha ka step sngi Nyngkong ha kaba ka la bamduh ïa kawei ka jaka buh tiar lane ka Godown jong u Anuj Bawri kaba ha Shillong.
Katkum ka khubor la ong ba kane ka Godown ba don ha ka Building Joavon Towers, kaba la long trai da ka Kong Jone Manners ha Umsohsun, ka la kem ding ha ka por 11 baje eiei mynstep.
Ka khubor ka ïathuh ba baroh ki jingdon jingem kiba don hapoh kane ka Godown ki la shah pynjulor lut ha ka jingklang ka ding.
Hadien ba la ïoh jingtip halor katei ka jingjia, ki Pulit pynlip ding ki la leit mar mar sha katei ka jaka ban tem ïa ka ding ha shuwa ba kan pur sha kiwei pat ki dukan kiba don marjan.
U trai jong kane ka Godown u Anuj Bawri u la pyntip ba kane ka Godown kadei ba buh ïa ki tiar Electric kum ki Computer bad kiwei kiwei.
U la ïathuh ba watla u dang hap kheiñ ïa ka jingduh nong hynrei la kheiñ antad ba kan poi palat T.70 lak namar baroh ki tiar ki la shah pynjulor lut ha kane ka jaka bad ka ding kaba la rhembha.
U la ong ba ki Pulit ki dang pynlong ïa ka jingtohkit hynrei la shu antad ba ka lah ban dei na ka jingthut ka bording (Short Circuit).
