Haba ka wan ka elekshon jong ka Khasi District Council, ka mih ka jingïakren halor ki riti dustur jong u khun Khasi Pnar bad ha kaba ïadei bad kane ka mat, ka don ka khyndew ka shyiap, kaba ngi shim ba ka dei ka hok nongkynti jong ki trai jaka lem bad ki bor jong ki Raid ne ki Hima lem bad ki aiñ kiba ka District Council, ka dei ban ri ban da ïa kitei ki riti ki dustur (Khasi traditional clothing).
Hynrei haba ngi peit ïa kane ka bynta, ngi ïohi, ba kumno ka sorkar MDA, kaba la khlieh da U Conrad Sangma, lem bad ka Executive Committee kaba la ïalam da ka UDP bad ka kynhun synrop jongka, ba ki la pyndem ha ka bor jong ka sorkar Assam, da kaba ki pynkheiñ ïa baroh ki kyndon bat khyndew jong ki riew shimet bad ki bor hima, ha kaba ki la aiti ïa ka jaka kaba 19 square kilometre sha ka Assam, ha ka soskular kaba ki la soi ha u snem 2022.
Kam dei tang katta, ngim lah klet ruh, ba ki don kumba 7,8 ngut ki MDC jong ka seng NPP, kiba la ñiewbeiñ ïa ki Syiem, ki Sirdar bad ki trai jaka, da kaba ki kyrshan ïa ka soskular jong ka sorkar Meghalaya bad ka Assam, ha katei ka jing ïasoi soskular ki ar jylla.
Ha kaba ïadei bad u pud jong ka India bad ka Bangladesh, la ïohi, ba ka District Council, ka la thet kti ïalade, halor katei ka mat, ha kaba ka la shu ailad ïa ka sorkar India, lyngba ki kontraktor jongka, ba kin kurup katba mon ïa ki jaka puta, kiba don sha khappud jong kitei ki ar tylli ki ri bad katei ka pyni, ba kam salia ïa ka jingduh ei jong ki jaka kiba poi da ki spah kilometre ha u pud jong ka Bangladesh, tang na ka daw jong ka jingker sainar shiah bad kane ka la kylla long ka jingtim kaba khraw ïa ki nongshong shnong khappud, ha kaba kitei ki jaka kiba hab sha lynder jong ka jingker sainar shiah, ki la kam trai bad thombor ki khar Bangladesh, namar ba ki shipai BSF ruh kim shlan shuh ban pahara ïa kitei ki jaka kiba don sha ki jaka lyngba jong ka jingker sainar shiah.
Mynta ka elekshon MDC, ka la poi bad kumta ka dei ka kamram jong u paidlang nongthep vote, ba kin sngewthuh ïa la ka jong ka bynta bad ka kamram jongki, ha kaba jied ïa ki dkhot sha ka Council bad kumta, lada ki sngew dei ba kin long trai ïa ki jaka puta, ki dei namar kata, ba kin peit biang ïa kitei ki ar tylli ki mat, kiba la jia ha kine ki khyndiat snem ba ladep bad kitei ki kynthup ïa ka jingkurup ei jong ka Bangladesh ïa ki jaka ba seisoh sha thaiñ Riwar bad nangta sa ka Assam na shaneng ïa kiba bun ki jaka kiba dei ka spah bah jong ka ri Khasi bad kiba pynlong ïa ki trai jaka, ba kin long sohshnong ha la ka jong ka ri bad ba kin nym iohlad shuh, wat tang ban thaw ïa i ïing tap shiliang, ba kin shong kin sah ïalade nalor kiwei pat ki jingeh ba ki nongshong shnong ha khappud ki la mad na ka por sha ka por.
