Nongpoh, Rymphang 03: Katba ka elekshon jong ka Khasi Hills Autonomous District Council (KHADC) ka la jan poi sa tang da ki sngi, ki ar ngut ki kyrtong na ka Bharatiya Janata Party (BJP) mynta ka sngi ki la thep kyrteng na ka bynta ban ioh ïakhun kum u kyrtong ba pura ha kane ka elekshon MDC 2025.
Kine ki kyrtong ka party BJP kiba la thep kyrteng mynta ka sngi ki kynthup ïa u Rodney Syngkli na Umsning Constituency bad u Manin Raja na Nongpoh Constituency. Kine ki 2 ngut ki la thep kyrteng ruh da kaba bam smai katkum ki kyndon hakhmat ki Returning Officer, kiba la pynbit pynbiang ïa ki kot ki sla ban ïa khun ha kane ka election MDC.
Ha kane ka sngi thep kyrteng, la synran lang ruh ïa u Bah Rodney Syngkli bad u Bah Manin Raja da ki nongïalam ka party lem bad ki nongkyrshan jong ki.
Haba kren sha ki lad pathai khubor, ki ar ngut ki kyrtong ki la pynpaw ba ka thong ba hakhmat eh ba ki kwah ban ïa khun ha kane ka elekshon MDC, ka dei ka jingangnud ban ai ka jingshakri kaba bha tam ïa ki paidbah bad khamtam ban thaw ïa kita ki aiñ kiba ai jingïada ïa ki trai muluk ki trai jaka.
U Bah Manin Raja, kyrtong ka BJP na Nongpoh, u la pynpaw ruh ba lada u poi ha ka bor kum uta u nongmihkhmat ha KHADC, un thaw ruh ki lad ki lynti ban phai khmat kyrpang ban pynioh jingsiew ïa ki nongsynshar ha ki Hima, ki raid bad ki Shnong kumba long lem ha ki rithor ka ri India ba ki ioh jingsiew na ka sorkar India.
Ki la pynpaw ruh, ba ki angnud ruh ban ïa khun ha kane ka elekshon MDC, ka dei namar ba ïa u lakam synshar hapoh ka ri, la synshar da ka sorkar BJP bad lada ki poi ha ka bor, kin ioh ban thaw shibun ki lad ki lynti ban ai jingmyntoi ïa ki paidbah ka jylla bad khamtam ruh ban pynsngew ïa ki jingeh jong ki trai muluk ki trai jaka ba kin ioh ïa ka jingïada na ka sorkar kmie ban thaw ïa kita ki aiñ kiba kyrpang ban ai jingïada ïa ki jaid bynriew rit paid jongngi, ki la bynrap.
