Palat shiphew ngut thep kyrteng ki kyrtong ban ïakhun ïa ka elekshon MDC ha KHADC ha ka sngi kut

Shillong, Rymphang 03: Kumba shiphew ngut tam ki la don ki kyrtong kiba la thep kyrteng ha ka 3 tarik Rymphang, 2025 na ka bynta ban aireng ïa ka elekshon sha ka ïingdorbar thaw aiñ jong ka Khasi Hills Autonomous District Council ka ban sa long ha ka 21 tarik Rymphang, 2025.
Kine ki 10 ngut ki kynthup ïa u Bah Michael Thongni uba ïakhun kum u kyrtong Independent na Nongstoiñ Constituency, u Bah Medalsing Lyngdoh uba long u kyrtong jong ka seng Congress ban ïakhun na Mawkyrwat Consituency, u Bah Barister Paul Thyrniang uba long u kyrtong jong ka Khun Hynñiewtrep National Awakening Movement u ban aireng na Mawkyrwat Constituency, u Bah Kansing Lynshiang uba long u kyrtong ka United Democratic Party ban ïakhun na Mawkynrew Constituency, u Bah Hilarius Warbah uba long u kyrtong ka seng Congress ban ïakhun na Mawkynrew Consituency, ka Dr. Amanda Pakyntein kaba long ka kyrtong jong ka National Peoples Party ban ïakhun na Mawkynrew Constituency, u Bah Pherdonnam Rngaid uba long u kyrtong jong ka seng Congress ban ïakhun na Langrin Constituency.
Ha kane ka sngi la don ruh arngut ki kyrtong jong ka Bharatiya Janata Party, kata u Bah Rodney Syngkli uba ïakhun na Umsning Constituency bad u Bah Manin Raja uba ïakhun na Nongpoh Constituency bad u MLA jong ka Sohïong Constituency u Bah Synshar Lyngdoh Thabah u ban ïakhun na Nongspung-Sohïong Constituency bad ha kane ka sngi na ka liang jong u CEM ka KHADC u Bah Pynïaid Sing Syiem u la thep kyrteng na ka bynta ban ïakhun ïa ka elekshon sha ka KHADC ka ban long ha ka 21 tarik u Rymphang mynta u snem.