Shillong, Rymphang 02: U Kyrtong ka Voice of the people’s Party (VPP) u ban ïakhun ïa ka elekshon MDC sha KHADC na Sohra Constituency u Bah John Wilson Thabah u la ong ba ka jingjied jong u ïa kane ka party ban ïakhun elekshon kadei halor ki nongrim jong ka.
Haba kren bad u nongthoh khubor hadien ba la dep ban thep kyrteng ïalade hapoh ka ophis Sub Divisional Officer ha Sohra u Bah Thabah u la ong, “Nga la bishar ïa kiba bun ki seng saiñ hima sima kiba bun tylli bad ki nongrim jong ki kiba don ha kane ka jylla bad hadien ba nga la peit ïa ki nongrim jong ka VPP nga shem ba kane ka party ka don ki nongrim kiba kaei ka thymmei kaba nga don khamtam eh ban wanrah ïa ka jingkylla ha ka saiñ hima sima, ban ïoh ïa ka jingsynshar kaba khuid kaba beit bad kaba peit ïa ka jingbit jingbiang jong baroh lang khlem da peit shilliang,” ong u Bah John.
Ha kaba ïadei pat bad ki jingkylli halor ki jingduna hapoh ka constituency u kyrtong ka VPP u la ong, “Ki jingduna ha kane ka constituency ki dang don bun bha, ha kine ki taïew bad bnai ba nga la ïaid ha ka jingïalap elekshon nga la ïohi bun bha ki jingduna khamtam ha ka ïoh ka kot, ka kam ka jam, ka trei ka ktah jong ki nongshong shnong, ka jingshah khñiot ki paidbah ha kiba bun ki liang bad khamtam eh ka jingkhang syndet ïa MCCL bad kiwei kiwei ki jingeh ba ki nongshong shnong ki ïakynduh hynrei halor kine kiei kiei baroh nga hap ban trei katkum ka bor kaba u MDC u don bad kaba la bynshet bad kaba ki paidbah ki la bynshet ha nga bad jied ïa nga kum u MDC ïa kata ngan ai kaba bha tam ban shakri ïa u paidbah,” ong u Bah Thabah.
U la ong ba ka jingmih jong u ban ïakhun ïa kane ka elekshon kum u nongthoh khubor ka long ba u la sngew donkam ïa ki nongthoh khubor ba kin mih lang ha ka kam saiñ hima sima.
