Jowai K, lyngkot, 31: Ki nongkyrshan jong u kyrtong ka Congress na Awwi-Khliehtyrshi Constituency ha ka sngi Thohdieng ki la mih paidbah ban ai ka jingkyrshan ïa u Bah Madonbai Rymbai hashwa ba un leit thep kyrteng ha ka jingïalang ba la pynlong ha phyllaw ka ïingdorbar jong ka shnong Khliehtyrshi, West Jaiñtia Hills District.
Ki paidbah ka shnong naduh ki longkmie, ki longkpa bad ki khun samla kiba pynsngew da kaba rah ïa ki kti ban ai ka jingkyrshan pura ïa u Bah Rymbai da kaba pynpaw ïa ki kam babha kiba une u MDC barim ula leh ha kaba ai jingshakri ïa ka shnong naduh ki kam pynroi bad ki lad pynïoh kam pynïoh jam ïa ki khun samla jong ka shnong.
U Bah Madonbai Rymbai ha ka jingkren ula ai ka jingïaroh ïa ki nongkitkam jong ka shnong kiba la khanglad ban pynlong shnong ïa kawei ka jaka kaba dang hap hapoh u pud u sam jong ka shnong Khliehtyrshi hajan ka jingkieng Myntdu kaba la wan ban buhai shnong na kiwei pat ki shnong.Hadien kane ka jingïalang ki nongkyrshan ki la synran ïa u Bah Madonbai Rymbai ban leit thep kyrteng ha ophis jong u Deputy Commissioner ka WJHD.
