Ka surok National Highway-6 ha East Jaiñtia Hills District ka la sdang ban wan dur biang kum ka surok kaba la shna ha ki snem kiba mynshwa hadien ba ka National Highway Authority of India ka la shimkhia ban maramot ïa kane ka surok kaba la jot rathai la katto katne snem na ka daw ka jingïaid jong ki trok kit dewiong kiba heh baroh arphew saw kynta.
Wat hapdeng ka jingkhang tih bad shalan dewiong da ka National Green Tribunal (NGT) hynrei ka jingïaid jong ki trok kam shym duna satia namarba ki shlem pynmih dewbilat kiba don da ki phew tylli ha East Jaiñtia Hills ki thied da u dewiong na ka jylla Assam ban thang ha ki pajwa pynmih dewbilat.
Hadien ka jingïakhih jong ki paidbah ka rilum Jaiñtia bad ki kynhun ki bapher bapher ka Sorkar Jylla ka la hap ban leit tynruh ïa ka Ministry of Road Transports and Highway ka Sorkar Pdeng kaba la mang pisa 219 klur tyngka ban shna pynbha biang ïa ka surok NH-6 kaba la jot rathai bad kaba la pynsyrtok haduh katta katta ïa ki paidbah nongleit nongwan ym tang ïa ki shnong kiba don hapoh ka East Jaiñtia Hills District hynrei wat ïa ki paidbah nongleit nongwan na kiwei ki jylla namarba kane ka surok ka long u budlum uba pynïasoh ïa kiwei pat ki jylla ha ka thaiñ Shatei Lammihngi kum sha ka jylla Assam, Mizoram, Tripura, Manipur.
Ka Joint Action Committee jong ka Dong Namchiang kaba hap hapoh ka Elaka Narpuh bad ka KSU ki dei kiba la mih sha surok ryngkat bad ki paidbah nongshong shnong ban pakhang ïa kane ka surok ha ki bnai kiba ladep ban pynibor ïa ka jingleh mynthi ka Sorkar namar ka jingsniew jong ka surok ka la pynsuhsat haduh katta katta.
Haba peit ïa ka shna pynbha biang ïa kane ka surok National Highway-6 ha ka thaiñ Narpuh, East Jaiñtia Hills District la itynnat bad lah ruh ban ong ba ka surok ka lah ban shan namarba la shna ha ka rukom kaba paka.
Katkum ka jingpyntip jong u ophis jong u Deputy Commissioner ka East Jaiñtia Hills District, ka jingshna ïa ka surok la lah ban pyndep haduh 50 percent bad la khmih lynti ba ïa ka jingpyntrei yn lah ban pyndep hashwa ban poi ka aiom slap, la pyntip ka
Ka shilynter ka surokbah NH-6 kaba hap hapoh kine ki jingthew jong ka jingjngai katkum ka jingsorjamin na ka 141.500 kilomitar haduh 145.000 kilomitar ka jingpyntrei ïa ka kam, kata, ïa ka ka GSB Laying la pyndep na ka 141.500 kilomitar sha ka144.600 kilomitar, ka DBM Laying la pyndep na ka 144.600 kilomitar sha ka 145.000 kilomitar, ka PQC Single Lane la pyndep na ka bynta 1 kilomitar hapdeng 141.500 kilomitar haduh 144.600 kilomitar bad ka jingpyntrei ïa ki nala la pyndep hapdeng 141.500 kilomitar haduh 145.000 kilomitar kata na ka 160.000 kilomitar haduh 167.000 kilomitar.
Ka jingpyntrei ïa ka DBM la pyndep hapdeng 160.00 kilomitar haduh 167.000 kilomitar ha ka jingjngai kaba 6.4 kilomitar bad ïa ka PQC ha ka jingjngai kaba 600 meter yn dang sdang.
Ha ka jingpyntrei ïa ki nala la pyndep hapdeng 160.000 kilomitar haduh 163.500 kilomitar bad bynrap ba na ka bynta kine ki jingpyntrei baroh, palat 50% la lah ban pyndep kat haduh mynta.
Ka Sorkar Jylla ka la hap ban shimkhia ban peit ba ka jingshna ïa ka surok Western Byepass ruh ka dei ban ïaid beit shakhmat namarba ka Sorkar ka ladep siew dep lut ïa ka bai lutksan sha ki trai jaka bad mynta ka jaka ka ladei ka jaka sorkar ym shuh ka nongkynti jong ki riewshimet.
Hynrei kaba sngewsih ban ïohi ka long ba ka surok Mawlai Bypass kaba dang shu plie paidbah da u Myntri Rangbah 5 snem mynshwa mynta ka la sdang khoh lut ka rong kat haduh ba ka la pynsyrtok ïa ki kali kiba ïaid na kane ka surok.
Ka jingshna ïa ka surok Shillong Dawki-Tamabil haba peit ïa ki rukom trei lehse lah ban ong ba ka jingtrei kam da long eh kaba suki namarba ka jingtrei ka ïaid beit khlem don jingpynthud kumba la jia ha ki snem ba la leit noh. Watla katta, u paidbah ba bun balang u khmihlynti ba ka jingshna ïa kane ka surok saw lain naduh Umshyrpi haduh 7 Mer bad ar lain na 7 Mer shaduh Tamabil kan dep noh kham kloi khnang ban weng ïa ka jingdheng kali kaba jur ym tang ha nongbah Shillong hynrei wat ha ka thain Upper Shillong.
Ka Sorkar mynta ka ïakynduh mawsiang sa ha ka jingdheng kali ha surok Shillong Jowai namar ka jingbym don jaka shuh ban shna surok namarba kane ka surok ka ïaid lyngba na ki shnong kiba ki ing briew ki la shlei baroh ar liang surok. Hynrei ka shong eh ha ka mon bajwat jong ka sorkar kumno ban weng ïa kane ka sohsat bad ki sohkyrdot.
