Sha ka 6 bnai ai shuti ka sorkar na bynta ki nongtrei sorkar ba donkam bujli dkhot met

Shillong, K Lyngkot, 10: Ka jingïalang jong ka Kynhun Myntri ka Jylla ha ka sngi Thohdieng ka la rai ban kyntiew sha ka hynriew bnai ka shuti na bynta ki nongtrei kam sorkar kiba donkam ban bujli thymmai ïa ki dkhot met na ka daw ka jingshitom jur.
Ïa kane ka rai la mynjur ha ka jingïalang ba nyngkong jong ka Kynhun Myntri ba la pynïaid da u Myntri rangbah ka jylla u Conrad K Sangma ha Sohra.
“Nalor kaba la don lypa, mynta ka sngi ka kynhun myntri ka la rai ba na ka bynta ki nongtrei sorkar kiba hap ban bujli ïa ki dkhot met briew, ngi la rai ban ai shuti shuh shuh haduh hynriew bnai na ka bynta ka jingshah sumar, la pynbna u Conrad Sangma.
U la ong ruh ba ka ju dei ka rukom treikam jong ka sorkar ba ki nongtrei kam sorkar ki ngat ha ki jingshitom kiba jur bad ha kum kine ki khep la ai shuti biang ïa ki katkum ka jingjur ka jingshitom.
U Myntri Rangbah u la ong ba kane ka jingai shuti shuh sa hynriew bnai kadei da kaba pynshong nongrim na ka jingsngew para briew da kaba buh hakhmat ba ki donkam kham bun ka por ha ka jingshah sumar khamtam haba ïadei bad ka jinghap ban bujli ïa ki dkhot met.
Da kaba pynpaw ba watla kum kine ki jingjia ki don tang khyndiat eh hynrei ki dei pat kiba donkam ban leh ei ei.