Shillong, K’ Lyngkot 10: Ka Khasi Student Union Sengkmie ka la pyntip paidbah ba ka la pyllait ïa ki aplikeshon form na ka bynta ka UPSC Scholarship jong ka KSU naduh ka 10 tarik jong une u bnai Kyllalyngkot.
Lyngba kane ka KSU ka pyntip paidbah ba kan ai scholarship sha ki samla Khasi ba don jingthmu ban pyntbit ïalade ha ka UPSC, CSE na ka bynta ka thup kaba ar (Second Batch).
Ka la ong ba ka jingjied ïa ki samla kan long lyngba ka examin ban pynlong da ka seng hi. Ka jaka na ka bynta ban pyntbit na ka bynta ka UPSC CSE kan dei sha Nongbah Delhi. Ka KSU ka la ong ban ïoh ïa ka jingtip ba kham bniah bad ban ïoh ïa ki aplikeshon form leit sha ka website jong ka KSU kata www.khasistudentsunion.com
Ka tarik ba khatduh ban pynpoi ïa ki form ka long ha ka 17 tarik mynta u bnai, 2025. Na ka bynta ka jingtip ba kham bniah, phone ha kine ki nombar 8414047191, 9362072048 bad 7005000599. Ban ïoh ïa ka form bad ban ïoh tip ïa ki kyndon dei ban scan ïa u QR code lane leit sha ka website ka seng.
Katkum ka kyrwoh na ka seng la ong, “Ka thong jong ka seng KSU ban ai da ka scholarship sha ki samla Khasi shynrang bad kynthei ka long ban pyntbit pynbiang ïalade na ka bynta ka Union Public Service Commission-Civil Service Examination ka long ban sei hi ïa la ki jong ki paradoh parasnam kum ki Civil Servant ki ban lah ban kyntiew ïa ka jaitbynriew hadien ba lah bun snem mynta ba ka jylla kam shym la lah shuh ban pynmih ïa ki Civil Servant na ka jylla.”
