Shen yn ïeng ka surok saw laiñ ha jingkieng Dhubri-Phulbari lyngba ka wah Brahmaputra

Shillong, K’ Lyngkot, 08: Ka jingtei ïa ka surok saw laiñ ha jingkieng Dhubri-Phulbari halor ka wah Brahmaputra hapdeng ka Assam bad ka Meghalaya ka dang ïaid kumba la thmu, ong u Myntri ka Sorkar Jylla uba khmih ïa ka tnat Bording u Abu Taher Mondal.
“Hooid, na ka liang jong ka Meghalaya, ka la pynslem khyndiat ha ka por shna bad ngi kham long shadien bad ka Assam. Na ka liang ka Assam, ki la pyndep la jan 34-35 tylli ki païa. Kata ka dei ka jinglong kaba mynta,”, la ong u Mondal ha ka jingïakren bad ki lad pathai khubor ha ka sngi Balang.
U Myntri u la pyntip ba u la leit jngoh ïa ka jaka ba la shna ha ka bynta jong ka Meghalaya bad “ki heh ophisar ki la ïathuh ïa nga ba kin pyndep hapoh ka por ba la buh lada ym don ki jingjia kiba sngewsih.”
Da kaba pynpaw ba kane ka jingkieng kan long ka jingkylla kaba khraw na ka bynta ka thaiñ Shatei Lammihngi, u Mondal u la ong, “u Myntri Rangbah jong ngi u ju ïasaid na ka bynta kane ka jingkieng naduh kaba sdang. Lada kane ka jingkieng ka ladep phin sa ïohi ka jingleit jingwan sha Guwahati kan long lyngba kane ka jingkieng tang namarba kane kan pynlyngkot ïa ka jingjngai bad nangta ki don kiwei pat ki daw ha ka ïoh ka kot kiba kiwei pat ki briew kin ïaid na kane ka jingkieng kumta ha kaba kut kin don ki kam pynroi bad ka ïoh ka kot. Nangta kane kan long ka jingrung ne jingmih shaphang sepngi na ka jylla jong ngi sha ka dewbah India.”
Haba kylli, u Mondal u la ong, “ka jingjrong jong ka jingkieng ka long 19.3 kilomitar. La ngeit ba ka dei ka jingkieng kaba jrong tam. Ngam tip shaphang kiwei pat ki jaka ha ka wah ba ka jingjrong jong ka jingkieng ka don hangta. Kan don palat 199 tylli ki païa kumta ka long ka jingkieng kaba jrong bha.”
“Shuh shuh, yn pynduna ïa ka jingjrong naduh Phulbari sha Dhubri. Palat 200 kilomitar yn pynlyngkot bad khamtam na Garo Hills. Kan pynlyngkot la kumno kumno bad kane kan dei ka jingkieng kaba baroh ki kali kiba mih na kawei pat ka liang sha Guwahati yn pyndonkam tang da kane ka jingkieng,” u la ong bad bynrap “kin don shibun ki kam khaii pateng. Haduh mynta ka jingmih ka long shaphang shatei jong u pud u sam jong ka jylla bad kane kan long tang kawei ka lynti mih sha ka liang sepngi. Kumta kane kan pynlyngkot ïa ka jingjrong, bad ka jingkit ïa ki mar baroh kan kham pynsuk ïa ka jylla,” ong shuh shuh u Mondal.
Katkum ka jingong jong u, la buh thong ban pyndep ïa kane ka jingkieng ha u snem 2028.
“Na ka liang ka Meghalaya, ka jingtrei ka la sdang shisnem hadien ba la shna na ka liang jong ka Dhubri, ha kaba la sdang shisnem mynshwa bad ladep ruh ban pyndait ïa ka slab na ka bynta 34 haduh 35 tylli ki païa. Kin don ar tylli ki ar tylli ki lynti ba kyrpang ki ban leit bad ban ïasoh bad saw tylli ki lynti kin bteng bad sa shisien shwa ban kut kan sa ïakhlad biang,” u la bynrap.