Shillong, K’lyngkot, 07: U Chief Secretary jong ka Jylla u Bah DP Wahlang ha ka sngi Baar u la pyntip ba ki Regional Committee ki lah ban shim por na ka bynta ban phah ïa ka kaiphod ha kaba ïadei bad ki hynriew tylli ki jaka ba don ka jingïakajia pud na ka daw ka jingwan jong ka elekshon ha ki ar tylli ki Autonomous District Council (ADC) ha rilum Khasi bad ha rilum Jaiñtia.
Ha ka jingïakren bad ki lad pathai khubor u Bah Wahlang u la ong, “ngi la don ïa ki komiti hynrei na ka bynta ka Phase-II, ngi la ïoh ïa ka jingpynjlan haduh ka 31 tarik Lber bad nga kyrmen ba ki kaiphod yn sa phah noh shwa kata.”
“Hynrei mynta namar ka jingpynbna ïa ka elekshon sha ki District Council, ki chairmen bad ki dkhot jong ki Komiti kin kham bunkam khyndiat namarba kin hap ban leit ïalap elekshon bad lehse ki donkam kham bun ka por hynrei ka kam ka la ïaid,” u la bynrap.
Ha kaba ïadei bad ka jingpyntreikam ïa ka rai ba la shim halor ka wat ïapynbeit pud kaba nyngkong bad ka Sorkar Assam, u Chief Secretary u la ong, “ka jingpyndep ban sieh ïa ki mawpud ka la urlong ha kine ki jaka.”
“Nga la shong jingïalang bad u Chief Secretary ka jylla Assam bad ha ka jingïalang la shim rai bad la pynïaid da u Home Secretary ha u bnai Naiwieng, ban khmih bniah ha kaba ïadei bad ka jingshim rai khatduh ïa ka jingïakren pynbeit pud jong ka wat banyngkong,” u la bynrap.
