Da ka bai cake bad ki marbam ai sngewbha Khristmas u Bah Sanbor sha ki 150 tylli ki longïing

Shillong, Nohprah 18 : Khnang ba ki longiing kiba duna ka ïoh ka kot kin ïoh lang ban lehkmen ha kane ka Khristmas, u MLA ka Shillong South, Bah Sanbor Shullai ha ka sngi Balang u la sam da ki marbam mardih sha ki 150 tylli ki longiing ryngkat ka pisa kaba mar 2000 tyngka ba kin ïoh thied cake ha ka sngi Khristmas.
Ïa kine ki marbam ba kynthup naduh u khaw, ka umphniang, u dai bad kiwei kiwei ki marbam u Bah Sanbor ula ïathuh ba la thied lyngba ka discretionary grants kaba poi baroh 7 lak tyngka.
Haba kren ha kane ka jingïalang, u Bah Sanbor u la ïathuh ba ka jingjied ïa kine ki longiing kiba kham duna ha ka ïoh ka kot la aiti ha ki Nongïalam Shnong jon gki 7 tylli ki Dorbar Shnong bad phah pat ïa ka kyrteng sha ka MCIC kaba dei ka kynhun kaba pyntyllun ïa ki kam hapoh ka constituency.
U Bah Sanbor u la ïathuh ba ka jingsam ïa kine ki jingai sngewbha Khristmas kadei tang na ka jingïa kynduh ïa ki arngut ki khynnah kynthei katba u dang thied jingthied na kawei ka dukan. “Haba ki ong ba ki kwah ban wan sha iing jong ka ban wan shim cake, nga la pyrkhat ba ki ruh ki donkam ban lehkmen lang ïa ka Khristmas kumba leh lang kiwei pat ki para briew. Kumta hi mardor nga la pynbeit bad da ka jingtreilang bad ki 7 Dorbar Shnong ngi la lah ban leh kumne kumba leh mynta,” u la ong.
Na ka liang u MLA u ong ruh ba kaba kham kor tam ha kane ka aiom Khristmas ka long tang ka jingduwai bad ka jingkynmaw markylliang na ka bynta kiba jynjar, kiba pang ba shitom bad kiba duk khnang ba kin lah ban kiew shaphrang ha ka jingim.
Shuh shuh u ong ba kane ka pisa kaba u pynlut na ka bynta kitei ki marbam ba u sam ha kane ka sngi ka dei kaba u pynlut na ka DG kaba baroh ki MLA ki ju ïoh 20 lak tyngka ha ka shisnem.
La donlang ruh ha kane ka sngi naduh ki nongïalam ka MCIC, nangta ki nongïalam shnong bad ruh ki nongïalam niam bad kiwei kiwei.