Shillong, Nohprah 16: U Myntri ka tnat Pule Puthi ka sorkar jylla u Rakkam A Sangma ha ka sngi Nyngkong u la ong ba kam don satia ka jingkylli na ka bynta ki nonghikai SSA school ba kin hap ban pyndep ïa ka eksam Meghalaya Teachers’ Eligibility Test (MTET).
Haba kren sha ki lad pathai khubor u Sangma u la ong, “Namarba ki dei ki nonghikai kiba la dep ruh ban shah thung kam, kam don shuh ka jingkylli ba kin hap ban pyndep ïa ka eksam MTET.”
U la ong ba ïa ka eksam MTET la pynlong katkum ki kyndon bad ki jingpynbeit kaba wan na ka Ministry of Education bad kumjuh ruh ki kyndon jong ka NCTE.
Katkum ka jingïathuh jong u, ka eksam MTET ka dei na ka bynta ka jingthung kam nonghikai ba thymmai kaba ju pynlong ha ka jylla.
Ka Meghalaya SSA Schools Association (MSSASA) ha ka jingïalang paidbah kaba la long ha ka sngi Nyngkong ka la shim ka rai ban dawa na ka sorkar jylla ba kadei ban pynlait ïa ki nonghikai SSA, kiba la trei ha lane shwa ka 1 tarik u Naitung, 2020 na ka jingïaleh ïa ka eksam MTET nalor ban thung ïa ka high powered committee ban khmih ïa ki mat kiba dangsah kaba kynthup ïa ka jingdawa ïa ki mat treikam kiba long shngaiñ ïa ki kam shakri jong ki palat 13000 ngut ki nonghikai SSA.
Ha kawei ka liang u Myntri u la kyntait pat ïa ka jingdonkam ban thung ïa ka high power committee bad ong, “Kane kadei namarba ka Meghalaya State Education Commission (MSEC) ka la dep peit ïa baroh ki kam, la ka long ïa ki SSA, ki mat ka sorkar, ki college bad ki university. Na ka liang ka commission shen kan sa aiti ïa ka kaiphod ha ryngkat bad ki jingai jingmut ne ki jingmynjur ba kumno ban ïaid shakhmat ban rai ïa ki mat jong ki nonghikai,” ong u Sangma.
U la banjur ba ka sorkar kan sa rai halor ki kam ba ïadei bad ka jingsngewkhia halor ka jingsiew naba kane ka kam ka donkam ïa ka jingïatai.
“Kum ka nuksa, ngi la dep tip shaphang ki jingeh haba ïadei bad ka jingsiew hynrei kumno ban ïaid shakhmat, ngi la pynkhreh ïa ki lad ki lynti haba ïadei bad ki SSA bad adhoc,” ong u Sangma.
