Shillong, Nohprah 13: Uwei u nong Bangladeshi, uba la wan rung beaiñ shapoh jylla Meghalaya, hadien ba la don ka jingkhih win ka saiñ pyrthei bad ka jingïaumsnam hapoh ka ri Bangladesh, u la shah bat ha ki shipai Border Security Force (BSF) hajan Petrol Pump Anjali.
Hadien ka jingïoh jingtip kaba thikna, ki shipai BSF ki la bat ïa itei u nong Bangladeshi uba la 20 snem ka rta uba la ithuh kyrteng u Munna Islam na ka shnong Kashpur, Bangladesh najan ka Anjali petrol station barim.
Katkum ka jingïathuh ki BSF, une u briew u la kubur ba u la rung shapoh u pud u sam ka India Bangladesh ha u Nailar, 2024, hadien ka jingjia ïaumsnam hapoh ka ri Bangladesh na ka bynta ban wad kam kaba biang hapoh India.
Ïa u la aiti noh sha Kench’s Trace Beat House hadien ba la pyndep ïa ka medical examination na ka bynta ban pyndep shuh ïa ki kam ba ïadei bad ka aiñ, bynrap ki BSF.
Ha kawei pat ka jingkhynra kaba la pynlong hapoh Baghmara kaba dang hab hapoh ka South Garo Hills bad Dawki hapoh East Khasi Hills, ki shipai BSF ki la lah ban pynpulom ïa ka jingpyrshang khaiï beaiñ bad ki la ïoh ban kurup ïa ki tiar beaiñ kiba la shongdor kumba T. 3.74 lak.
Kine ki tiar kiba la kurup ïa ka dohkha, ki vacuum flask, ki blanket, u sying, beedi bad kiwei ki tiar bam. Baroh kitei ki tiar ba la kurup la aiti noh sha ka ophis Custom na ka bynta ban pynlong shuh ki jingtohkit bad ban pyndep ïa ki kam baroh katkum ki aiñ.
