Jowai, Nohprah 12: Kiba duna ha ki dkhot met khamtam kito kiba don ka jingduna ha ka bor ïohi, hynnin ka sngi 11 tarik u Nohprah, 2024 kila leit ïa kynduh ïa u F.B. Basan Additional Deputy Commissioner, West Jaiñtia Hills District uba long ruh u Project Director Department of Rural Development Agency ban kyrpad ïa u ban pynïoh haki ïaka hok kaba ki dei ban ïoh.
Kane ka kynhun hapoh ka jingïalam jong u Kelvin Suting bad u Krishna Phawa, kila leit ban ïa kynduh ïa u Project Director ka DRDA na ka bynta ba ka sorkar kan ai noh ïaki ka Special Job Card haka scheme shispah sngi.
U Krishna Phawa uba ym lah satia ban ïohi ula ong ka dei ka hok jong ki ban ïoh ïa ka Special Job Card, hynrei haduh mynta kiba bun na ki nongshong shnong kiba don jingduna ha ki dkhot met kim ïoh satia ïa kane ka hok jong ki.
Napdeng kiba la wan ïakynduh kiba don jingduna haka bor ïohi kum ka Durka Sari bad u Kelvin Suting ki ïathuh ba ïalade kila ïoh Special Job Card, hynrei kim kwah pat ba tang ma ki kin myntoi na kane ka scheme sorkar. Naka liang jong u bah Basan ula kular ban un leh ïa kaba donkam ba kiba don jingduna haki dkhot met kin ïoh ïala ka hok ban ïoh ka Special Job Card.
Ha kane ka juh ka jingïalang naka liang jong kine ki dkhot kiba don jingduna ha ka bor jingïohi kila pynkynmaw ruh ïa ka hok jong ki ban ïoh ïa ka Special Ration Card. Halor kane ruh u bah FB Basan ula kular ba katba shong ka bor jong u un ïarap ban kin ïoh ïala ka jong ka hok. Ha kane ka jingleit ïakynduh jong ki ïa u ADC la ïadonlang ruh u Dr. H.H. Mohrmen.
