Da ki lama ïong bad banner ba ïong yn pynlong ka NESO ha baroh ki jylla kane ka thaiñ lammihngi

Shillong, Nohprah 09: Ka North East Students Organization (NESO) ka la khot ban pynlong da ka jingwah ïa ki lama ïong bad ki banner ba ïong ha ki 7 tylli ki jylla kane ka thaiñ shatei lammihngi ha ka 11 tarik mynta u bnai, kum ka dak ka jingpyrshah ïa ka Citizenship (Amendment) Act, 2019, kaba ai lad ban pynlong nongshong shnong ïa ki bar ri kiba wan buhai shnong beaiñ na Bangladesh, Pakistan bad Afghanistan.
Ha ka jingkynthoh ba la pynmih ha ka sngi nyngkong na ka liang ka NESO ka la ong, “Ngi kwah ban pynkynmaw ïa ki nongshong shnong jong ngi kiba don ha kane ka thaiñ ba ha ka 11 tarik mynta u bnai 2019, wat hapdeng ka jingpyrshah na ki trai ri trai muluk jong kane ka thaiñ North East pyrshah ïa ka Citizenship (Amendment) Bill 2019, ka sorkar India kam shym la sngap bad lyngba ka Rajya Sabha ka la mynjur ïa kane ka aiñ ïakjakor kaba la tip da ka Citizenship (Amendment) Act 2019. Ka NESO, ka la pynbna ba ka 11 tarik u Nohprah yn kynmaw ïa ka kum ka Black Day na ka bynta kane ka thaiñ baroh kawei.”
“Kumta kum ban bteng ïa kane ka jingrakhe jong kane ka Black Day, ka NESO ka la rai ban wah ïa ki lama ïong bad ki Banner ba ïong ha ki jaka ba kongsan kiba don ha kine ki jylla kane ka thaiñ shatei lammihngi ha ka 11 tarik mynta u bnai, 2024. Kane ka jingrakhe ka long ruh kum ka khubor sha ka sorkar pdeng ba ngi pyrshah ïa ka Citizenship (Amendment) Act 2019 bad ha kajuh ka por ka long ruh kum ka jingpynkynmaw ïa ki nongshong shnong ba ka sorkar pdeng ka la leh bym hok ïa ki trai ri trai muluk jong kane ka thaiñ baroh kawei,” ong ka NESO.
Ha kajuh ka por ka NESO ka kyrpad ïa baroh ki nongshong shnong kane ka thaiñ ban kyrshan ïa kane ka jingrakhe bad ban bteng ban ïakhun ïa ka hok kaba u blei u la ai ïa ki nongshong shnong.