Mynjur ka Kynhun Myntri ban ai da ka song kyrpang ïa ki nongtrei MCCL shwa ban khang dam noh

Shillong, Nohprah 09 : Ka Kynhun Myntri ha ka sngi Nyngkong ka la pdiang ïa ka jingtyrwa ban ai da ka song kyrpang sha ki nongtrei ka Mawmluh Cherra Cement Limited (MCCL) ha shwa ba kin khang dam noh ïa ka.
U Myntri Rangbah ka Jylla, Conrad K Sangma haba pynbna ïa kane ka rai hadien ka jingïalang jong ka kynhun Myntri u la ïathuh ruh ba ka sorkar ka la dep ban pynbeit na bynta katei ka jingai kyrpang kaba shisien ha shwa ba kin khang khyrdep noh ïa ka MCCL.
Haba kren bad ki lad pathai khubor, u Myntri Rangbah u la ong ruh ba kane ka jingai kyrpang ka long ruh kum kata ka jingai khublei khatduh ïa ki nongtrei jong katei ka karkhana pynmih dewbilat kaba don ha Sohra. La ïathuh ruh ba ïa kane ka sienjam ki la shim hadien ka jingïakren bad ka jingïasyllok kaba sani bha bad ki nongtrei ka MCCL.
U ong ruh ba mynta na ka liang ka sorkar kan tyrwa ïa kane ka skim bad kaba syllok biang bad ka synjuk jong ki nongtrei ka MCCl bad kiwei bad nangta kin sa pyndep ïa ka jingïasoi ha shwa ba kin jam shakhmat ïa ka kam.
“Hadien ba la dep kine baroh, ngin sa lah ban pynïaid shakhmat ïa ka kam.”
Katkum ka jingïathuh jong u, katei ka song kyrpang kan kynthup lut ïa ki jinglut la ka long haduh ka jingsiew bad haduh kiwei kiwei kiba dang sah.
“Ngam pat lah ban ai ka jingtip kaba bniah tangba lada khein kyllum kan poi kumba 100 klur eiei,” u la ong da kaba ïathuh ruh ba ka MCCL mynta ka don kumba 205 ngut ki nongtrei.