Shillong, Nohprah 09: Ka Directorate of Commerce and Industries, ka sorkar jylla ka la soi ïa ka jingmynjur bad ka jaka pule National Institute of Technology (NIT), Meghalaya. Kane ka jingïatreilang ka thmu ban pynthymmai ïa ki kam wad bniah ne kaba ki ong ka Innovation and Research Centre ha Shillong ban pynbha ïa ki kam thaiñ jaiñ bad ki tiar ba la shna da ki kti ha Meghalaya.
Kane ka dei ka prokram hapoh ka Raising and Accelerating MSME Performance (RAMP) jong ka Ministry ka MSME, ka sorkar pdeng bad kaba la ïoh ruh ka jingkyrshan da ka World Bank, ha kaba kane ka thmu ban pynbha bad ïa ki jingpynmih ïa ki tiar bad kumjuh ruh na ka bynta ban pynïoh ïa ka ïew ka hat ha kaba ïadei bad ki tiar ba la shna bad thaiñ da ki kti.
Kane ka jingïatreilang ka long ruh kum shi bynta ban kyntiew ïa ki nongthaiñ jaiñ bad shna tiar kiba dei napoh ka jylla kaba dei ruh ka jylla kaba riewspah bha ha ka kolshor bad ki jinghiar pateng jong ka.
Haba kren ha kane ka prokram na ka liang u Bah Friday Sutnga, Director, Commerce and Industries
Department, u la pynpaw ïa ka jingshaniah ha kaba ïadei bad kane ka project, da kaba banjur ruh ba kan don ka jingïaleh bad jingpynpaw hapoh ka ïew ka hat, la ong ba kane ka Centre kan plie lynti ha ki kam wad bniah kaba lah ban ai ka jingïarap lyngba ka NIT Meghalaya sha ki jaka bapher bapher.
Lah ban ong ba ka jingthmu jong ka jingdon kane ka Centre ka long ban wad bniah bad ban pynmih ïa ki tiar kiba thymmai lyngba ki jingpynwandur kiba thymmai ba la shna da ki nongshna tiar na la ka jong ka jylla.
