Shillong, Jylliew: Ka Synjuk Ki Kynthei Katholik, Shillong Archdiocese da ka jingsngewkhia mynsiem, ka pynrem jur ïa ka kam bymman ba la leh da u kpa uba la shim jyndat ïa ki artylli ki mynsiem ba lui lui ki ba dei hi ki khun ki jong u ha ka jingjia ka ba la jia ha ka 31 tarik Jymmang 2022.
Ka Seng ka la ong ruh ba kane ka jingjia ka la pynsngewtriem bad pynsuhjer ym tang ïa ki longkpa bad longkmie hynrei ïa ka jaidbynriew Hynñiewtrep hi baroh kawei. Ha kajuh ka por ka Synjuk ka kyntu ïa baroh ki longkpa bad longkmie ba kin ri kin sumar ïa la ki khun; ban pynheh pynsan ïa ki kat kum ka jingsaiñ dur ba la buh da U Blei Nongbuh Nongthaw.”Phi ki kmie ki kpa, wat pynsalia ïa la ki khun.To pynsan pynrangbah ïa ki da ka jinghikai bad ka jingbthah kiba ïadei bad U Trai” (Ephesus:6-4).
Shuh shuh na ka liang ka Synjuk ha u kyrwoh lyngba I President ka phah ruh ïa ka jingsngewlem sha ka kmie bad ki ba haïing ha sem jong kine ki arngut ki lanot. To U Trai Un ai ha ki mynsiem jong ki ïa ka jingjahthait ka bymjukut bad jingshai bymjukut kan tyngshaiñ ha ki; kin jahthait ha ka jingsuk.
Kane ka jingjia ba sngewsih ka la wanrah ruh ka jingpynrem na ki kynhun bapher bapher.
