Shillong, Jylliew 07 : U MLA barim jong ka Sohiong Bah HDR Lyngdoh ha ka sngi Balang u la ong ba watla u bynnud haduh katta katta ban mih noh na ka Congress hynrei um banse pat namar kim i don jingkyrmen shuh ban dang ïai neh ha katei ka party.
Utei u rangbah uba la bat teng ruh kum u Myntri Kampohïing ka Ri, u la pyntip ruh ba ha katei hi ka sngi u la dep ban phah da ka shithi sha u President ka Meghalaya Pradesh Congress Committee, Bah Vincent H Pala ba un mih noh na ka party.
“Da ka jingbynnud nga la shim ïa ka rai ban mih noh na kane ka party kaba la plie lad ïanga ban don ha ki kyrdan bapher bapher ha kine ki phew snem ba nga don ha ka kam shakri paidbah. Hynrei ha kaba khatduh hi nga hap ban sngap ïa ka sur jong ki nongkyrshan kiba pynsngew hanga ba dei ban mih noh na ka Congress,” la bynrap shuh shuh u Bah HDR haba kren bad ki lad pathai khubor.
Shuh shuh u la ong ba ka jinglong jingman ha ka party ka la sdang ban kylla dur naduh ka jingmih noh jong ki 17 ngut ki MLA ba kynthup ïa ki 12 ngut kiba leit ban pynïasoh sha ka Trinamool Congress bad 5 ngut pat kiba la shah sospon.
“Kane ka la pynlong ïa ki nongkyrshan ba shitrhem jong nga kiba la donlang bad nga ha kine ki 29 snem ba kin duh mynsiem bad syier jingmut ha kaba ïadei bad ka jinglong jingman jong ka party. Ki la don katto katne ki nongïalam ka party kiba ju don bynta ban pynkhlaiñ ïa ka party kiba la wan ban pynpaw ba ka Congress kam i don jingkyrmen shuh bad ba la donkam kyrkieh ban pyrkhat thymmai,” la ïathuh shuh shuh u Bah HDR Lyngdoh.
La ïathuh ruh ba dei ha ka 04tarik mynta u bnai baroh ki unit jong ka Congress ha Sohiong ki la shim ïa ka rai kaba khatduh ban mih noh na ka party bad ban ïakhun noh na ka party riewlum.
Kawei pat ka bynta kaba u Bah HDR Lyngdoh u pynpaw ka long ba kito ki rangbah kiba kam ba ki dei ki nongïalam jong ka Adhoc Committee jong ka Congress Sohiong, kim dei satia ki nongïalam jong ka Congress hynrei ki dei na kiwei kiwei ki party shwa kane.
Utei u MLA barim watla u kyntait ban ïathuh ïa ka party thymmai kaba un leit ban pynïasoh hynrei la sngewthuh ba shen ka UDP kan sa pdiang burom ïa u bad pynbna ruh kum u kyrtong jong ka na bynta ka elekshon MLA 2023.
