Shillong, Nohprah 08: Ka Voice of the People Party (VPP) ka la pynlong ïa ka workshop kaba shi sngi halor ka khyrnit Bahynriew jong ka riti synshar jong ka ri India na ka bynta baroh ki kyrtong jong ka seng ki ban ïakhun ïa ka elekshon MDC.
Ha kane ka worshop u Dr. Batskhem Myrboh, Associate Professor, jong ka tnat Political Science, NEHU bad u nongaiktien jong ka seng u la long u nongai jingkren uba kongsan.
Ha kane ka workshop, la pynsngewthuh ïa ki nongïashim bynta ha kaba ïadei bad ka nongrim jong ka VI Schedule, ha kaba ki don ki mat ki bym biang ha kane ka khyrnit bad ka jingpynmih ïa ka jylla Meghalaya.
Ha kane ka workshop ka la don ruh ka jingïasyllok ha kaba ïadei bad ki Autonomous District Council ha Meghalaya hadien ba la ïoh ïa ka jylla. Ha kane ka workshop ki la don ki jingïasyllok ha kaba la sam lang da ki nongïashim bynta ba kynthup naduh ki muktiar, kiba pule History bad na kiwei kiwei pat, ong ka kyrwoh ba la phah da u Dr. Batskhem Myrboh SpokespersonVPP.
