Nongstoiñ, Nohprah 07: Ha ka shiteng sngi jong ka sngi saitjaiñ 7 tarik Nohprah 2024, ki riew paidbah ba ïaid ba ieng ha iew Nongstoiñ, ki la lap ïa kawei ka met ïap kaba la shu thiah lyngktar ha kawei ka ïing jah kaba don ha khlieh iew Nongstoiñ.
Katkum ki tyllong khubor la ong ba mar syn ïohi ïa ka met kaba shu thiah ha katei ka ïing jah, ki riew paidbah ki la pyntip sha ki pulit bad hadien ba ki pulit ki la wan ban leh la ka kamram, la ïoh jingtip ba utei u ba ïap la tip kyrteng u Kynsai John Marweiñ 30 snem ka karta u ba shong ba sah ha them iew Nongstoiñ.
Kat haduh ba thoh ïa kane ka khubor ym shym la tip satia ïa ka daw jong ka jingïap utei u briew, hynrei na ka liang ki pulit ki dang pynlong ïa ka jingtohkit. Kumjuh ruh ïa ka met ïap la pynkit noh mar mar sha Nongstoiñ Civil Hospital na ka bynta ban pyndep ïa ka post mortem.
