Shillong, Nohprah, 07: Kum ka jingpynkhreh ïa ka lehniam Christmas, u MLA jong ka South Shillong Constituency Bah Sanbor Shullai ha ka sngi Saitjaiñ u la ai jingïarap pisa ba u la pynlang na ka tulop lajong sha ki kynhun Balang bapher bapher kiba don hapoh ka jylli jong ka South Shillong Constituency.
Ha kane ka jingïalang ba la pynlong da u MLA ryngkat ka jingïatreilang bad ka Monitoring cum Implementation Committee 19th South Shillong Constituency ha State Convention Centre, la donlang ruh ki nongmihkhmat na ki kynhun Balang bapher bapher kiba la ïashim bynta ha ki jingduwai bad ki jingrwai Christmas.
U Bah Sanbor Shullai haba ai jingkren ha kane ka sngi u la ong, “kane ka jingïarap pisa sha ki Balang ka dei kaba nga la pynlang T.6 lak tang na ka tulop lajong.”
“Ka jingïarap pisa ka long ban kyrshan ïa ki kynhun Balang ba kin dup lah ban leh ïa kino kino ki kam kiba ïadei bad ka jingrakhe ïa ka Christmas ha kane ka aiom bad ba kin dup lah ban ai jingïarap ïa kiba duk ba suk kiba donkam kyrkieh ha kum kane ka por,” u la ong.
U la ong ruh ba kum u nongmihkhmat bad kum u kpa jong ka Constituency u angnud ban leh bha ïa baroh ki kynhun kiba don hapoh ka jylli jong ka Constituency khlem da leh shiliang khmat ïano ïano ruh.
“Kum u Nongmihkhmat uba mihkhmat na ka thaiñ kaba shongkhleh lut ki Jaidbynriew bad ki kynhun niam bapher bapher kadei ka bynta jongnga ban burom ïa baroh ki jait niam bad ruh ban lum ïa ki jingkynduh lang man ka por ba kino kino ki kynhun niam ki don ïa ki sngi khraw,” u la ong.
Shuh shuh u ong ruh ba kane ka sienjam ba u shim ka long ruh na ka bynta ban wanrah ka jingïajan bad ka jingïakynduh lang jong baroh ki nongïalam niam kiba don ha ka constituency.
U Bah Sanbor u la ïathuh ba kane ka jingkyrshan pisa kam dei satia tang ïa ki kynhun niam hynrei u ki sam ruh ïa ki Dorbar Shnong kumjuh sha kiwei ki kynhun niam ha ki sngi khraw jong ki kum ka puja bad kiwei kiwei.
Ha shwa kane, ki Nongïalam Niam bad kumjuh ki Nongïalam Shnong ki la pynpaw ka jingsngew kmen ba ki ïoh ïa u nongmihkhmat uba ju don lang bad kynmaw ia ki ha kum kine ki sngi khraw kiba ka Jylla baroh kawei ka ju kheinkor bha tang shu poi u bnai Nohprah.
Shwa ban sam ïa ki song jingïarap, u Bah Sanbor ryngkat bad ki nongmihkhmat jong ki Balang u la ot ïa u Cake Christmas ba la sam lang sha baroh kiba la wan ha kane ka janmiet.
