Nongpoh, Nohprah 07: Hadien ba 30 ngut ki samla naka them Ri-Bhoi kila shim bynta shitrhem ban pyni ïaki sap rwai bad shad haka Semi Final jong ka ka Ri Bhoi Super Star-Season-2 bala pynlong da ka LS Syiemlieh Production mynta ka sngi ha Parish Hall Nongpoh, 15 ngut naki kila shah jied ban rung shaduh ka thup Grand Finale jong katei la lympung ka ban sa long ha u bnai Kyllalyngkot 2025 ha Umsning.
Ha katei ka Semi Final kaba la long mynta ka sngi naka liang ki samla kila trei shitom ban pynsiang ïa u ryndang bad pynkhih met ban pyni ïaka sap shad bala wan ban khmih bñiah da u Samla Standwell Manih, ka Samla LB Driss Syiemlieh bad ka samla Jerica Kharkrang kum ki nongbishar ïaka sap ka phong jong ki samla.
Kumba la pynpaw da u Bah Lansius Syiemlieh, CEO ka LS Syiemlieh Production, ka jingthmu ba la pynlong ïa kane ka Ri Bhoi Super Star, Season-2, ka long ba sei madan ïa ka sap ka phong ki khun samla kiba don sap ha ka rwai ka siaw bad ka shad pynkhih syngkai bad lyngba kane ka ryngsan ki lah ban pynpaw pyrthei ïa ka sap kyrpang ba u Blei u la ai haki bad lehse lyngba kum katei ka rynsan kan long ruh ka lad aikam aijam ïaki khun samla lyngba ka sap kaba ki don.
U la ong ruh ba lada ym don kum kine ki rynsan kan long kaba eh ïaki khun samla ba kin pynpaw pyrthei ïaka sap ka phong kaba ki don hynrei lyngba ka jingshimkhia jong ka LS Syiemlieh Production kan long ka jingkyrkhu ïaki khun samla ba kin kiew shaphrang lyngba ka sap kaba ki don la ka long haka rwai ne ka shad bad lyngba kane ka rynsan kan long ka kabu ïaki khun samla namar ïa kum kane ka lympung yn pynlong naka por shaka por.
