Shillong, Nohprah 04: U Myntri Rangbah ka jylla u Conrad K Sangma ha ka sngi Balang u la buh ïa u mawnongrim na ka bynta ban tei ïa ka Shillong Ropeway kaba dei ka Project kaba la thmu ban shna da ka sorkar jylla, bad kane ka projek ka dei ruh kaba la buh maw nongrim da ka President jong ka ri India ka Droupadi Murmu ha ka 16 tarik jong u bnai Kyllalyngkot une u snem ha ka jingïadonlang u Myntri ka tnat ki Kam Jngohkai ka jylla u Bah Paul Lyngdoh.
Ïa kane ka jingbuh ïa u mawnongrim la buh hapoh ka Shillong peak view point.
Ha kane ka prokram na ka liang u Myntri Rangbah bad u Myntri ka tnat Jngohkai ki la aiti ïa ka shithi jong ka jingpdiang sha ka kompeni kaba dei ban pyndep ïa kane ka projek ka KEC International Limited – Tantia Construction Limited JV, ha kaba ïa kane ka projek la buh hapoh ka jinglut kaba la kot kumba T. 175 klur.
Lah ban ong ba kane kan dei ka projek kaba nyngkong eh ha kane ka jylla kaba dei ruh ka ropeway project ka ban kit ïa ki nongshong shnong ne passenger, kaba la pyntreikam hapoh ka jingïatreilang bad ka company jong ka ri France ka POMA, ha kaba ka bynta kaba kongsan jong ka ka long ban phah ïa ki tiar na ka bynta kane ka project.
La ong ba na ka liang ka sorkar ka la pynmih bun ki projek jingtei na ka bynta ban kyntiew ïa ki kam jngohkai ha kane ka jylla ha kaba ka ropeway project ka la dei kawei na kine ki sienjam.
Ha kane ka sngi na ka liang u Myntri Rangbah ka jylla u la aiti ruh ïa ka second instalment kaba T. 1.5 klur sha u Bah Glanding Lyngdoh, general secretary ka Riat Laban Dorban Pyllun, kaba dei ruh ka pisa kaba la ai sngewbha kaba la kot sha ka T. 3 klur na ka bynta ka bai jaka.
Haba kren ha kane ka sngi u Myntri Rangbah u la ïaroh ïa ki nongshong shnong kiba la lah ban pyndep ïa ki kam ba ïadei bad ki kot ki sla kiba donkam khnang ban ïoh sdang noh ïa kane ka project.
“Ki la don bun ki jingeh ha kaba ïadei bad kane ka kam khamtam ban ïoh ïa ka jaka, ka jingai jingbit ban ïoh shna ïa ka Meghalaya Ropeway Development Authority kaban long kaba bha bad kaba biang ki lad jingïada bad kumjuh ruh ka jingïoh ïa ka laisen. Ban pynurlong ïa kane ka kam ka la shim por haduh 4 snem na ka bynta baroh ki jingpynkhreh,” u la ong.
U Myntri Rangbah u la pynpaw ruh ïa ka jingai khublei ïa ka Raid Laban Dorbar Shnong Pyllun ba ka la ai ïa ka jingïatreilang ha kaba ïadei bad kane ka projek. Lah ban ong ba kane ka project kan ïaid lyngba ka Laban, Madan Laban, Upper Lumparing, Lower Lumparing, Lumkjatsngi, Oxford Hills bad Rngi Shillong.
Haba kren shaphang ka jingïadon bynta lang jong ka imlang sahlang ha kane ka project, u Myntri Rangbah u la ong, “Ka long ka kam kaba kongsan ban ïoh ka jingïatreilang bad ki nongshong shnong ryngkat ka jingïarap lang jong ka sorkar. Kane ka project ka dei ka jingmih na ka jingïatreilang hapdeng ki nongshong shnong bad ka sorkar. Kane ka project lah thikna ba kan wanrah ïa ka jingïoh kamai ha kaba khatduh kan long ruh ka jingmyntoi ïa ka Dorbar bad ki nongshong shnong,” ong u Myntri Rangbah.
U Myntri Rangbah u la ai ruh ka jingïaroh ïa ki shipai ka Air Force ba ki la ai ka kti ka mon ka kti ka diang ban ïarap lem ha kaba ïadei ba kane ka project.
U Myntri Rangbah u la ong ba ka sorkar ka la peit ban pynïoh sa kawei pat ka lynti ka ban pynïasoh ïa ki kam jngohkai bad ka ban pynkylluid ïa ka jinghiar jong ka Ropeway ha Madan Laban.
U la pyntip ruh ba ka sorkar kan sa tei ïa ka lynti ïaid ka ban long kumba 4 km ka ban pynïasoh ïa ka surok bah ha 101 Area, Upper Shillong.
“Ka ropeway ka dei kawei na ki kam jong ka kit ka bah kaba lah ban pynkylluid ïa ka nongbah kaba la khapngiah lypa,” u la bynrap.
Kiwei kiba la donlang ha kane ka sngi ki long u Chairman ka Meghalaya Tourism Development Corporation, u Bah Sanbor Shullai, Chief Secretary, D. P. Wahlang, Commissioner & Secretary Tourism, Dr. Vijay Kumar D bad Director Tourism, Cyril V.D. Diengdoh.
Ha kane kajuh ka sngi, u Myntri Rangbah u la buh ruh ïa u mawnongrim na ka bynta ban tei ïa ka 5-star hotel kaba lai ha ka jylla, kata ka Aurika Hotel -Lemon Tree Hotels Ltd, ha phyllaw jong ka Orchid Hotel, Polo Shillong.
Kane ka hotel ka ban sa ïeng ha ka jylla kan don haduh 130 kamra yn tei ha ka jinglut kaba 124 klur tyngka lyngba ka Public-Private Partnership (PPP) mode.
