Nongstoiñ, Nohprah 04: Kum ka jingpynkhreh na ka bynta ka Election MDC ka ban sa long ha u snem ban wan, ka Hill State People Democratic Party Nongstoiñ area unit, kan pynlong ïa ka general meeting ha ka 7 tarik mynta u bnai kaba dei ka sngi saitjaiñ ha Upper New Nongstoiñ L.P skul ha ka por 10.30 baje mynstep.
Ha u kyrwoh ba la pyllait mynta ka sngi da u bah B.Thongni secretary ka HSPDP Nongstoiñ area unit, u la kyrpad ïa baroh ki nongkitkam kum ki president bad secretary bad ki nongkyrshan na baroh ki primary unit, kin ïaleh shitom ban pyllait por khnang ha katei ka sngi bad ban pynpoi sha ka jingïalang.
Nalor kata u la kyrpad ruh ïa kito ki bym shym la ïoh pdiang ïa ki jingpyntip lyngba ki notice, lada ki ïoh jingtip na ki para shnong ne ki para marjan kin wan ha katei ka sngi, khnang ba ka jingïalang kan ïoh ban ïapyrkhat bad ïatai sani ha kaba ïadei bad ka jingpynkhreh na ka bynta ka Election MDC ka ban sa wan. Ha katei ka sngi u bah K.P.Pangñiang president rangbah ka party un ïadon ryngkat ha ka jingïalang.
