Kylla dur lut ki surok naduh Upper Shillong haduh Dawki, dang ïakhun ïa ka Bye-pass

Shillong, Nohprah 01: Ka jingpyntrei ïa ka surok Shillong – Dawki ïa kaba la bei tyngka da ka Japanese International Cooperation Agency (JICA) ka la sdang ban ïaid stet bha mynta lait noh tang ha ka Package -3, kaba dang don mynta ha ka jingïakhun.
Haba buddien halor ka jingpyntrei ïa kane ka surok naduh Shillong shaduh Dawki, na ka liang u Symbud Myntri Rangbah ba dei peit ïa ka tnad PWD, Bah Prestone Tynsong u la pyntip ruh ba ki don ka jingkyrmen ba ka jingpyntrei ïa kane ka surok kan dep ha ka por ba la buh, kata ha u snem 2026.
“Ka thong ka long ban pyndep noh ha u snem 2026 bad phi la ïohi markhmat ïa ka jingpyntrei naduh ka Package -1, Package -2, Package -4 bad Package -5, kine baroh saw tylli, ka kam ka la ïaid shakhmat,” ong u Symbud Myntri Rangbah haba kren bad ki lad pathai khubor.
Tangba, u ong pat ba ka bynta kaba sah mynta ka long sa tang ban shim jaka ïa ka Pynursla Byepass kaba ha hap ka Package -3.
“Ki kompeni ba pyntrei ïa kine ki saw tylli ki package ki la trei borbah bad nga kyrmen skhem ba kin lah ban pyndep ha ka por ba la buh. Ngi la ïohi ruh ba ka rukom treikam la ka long da ki bor mashin ruh ka la ïaid beit ym dei tang shi jaka hynrei haduh san ne hynriew jaka man ka package,” u la bynrap biang.
Hynrei haba kren pat halor ka Package -3 kaba dei jong ka Pynursla Byepass, u Bah Prestone u la pynpaw ba um pat nud satia ban ong namar haduh mynta ka dang ïaid ka jingshim jaka.
“Kumta lah ban ong ba lada ki trei kumne hynriew – hynniew jaka ha kawei ka package ha kajuh ka por, nga kyrmen bad nga ngeit ba kin lah ban pyndep ha ka por kaba biang.
Haba ïadei pat bad ka fourlane naduh Umshyrpi ter ter haduh Mylliem, u Symbud Myntri Rangbah u la ong ba ka jingpyntrei ïa kane ka package ruh ka stet bha. “Baroh ki kam ba ïadei bad kane ka package la dep lut bad wat ki ishu ba dei bad ki shipai ruh la dep ban pynbeit lut.”
U la ong ba kum ka Sorkar kin dang ïai buddien ïa ka kam bad ka NHIDCL ryngkat ki kompeni ba pyntrei khnang ba ka kam kan long kaba ïaid beit.
Ha kajuh ka por haba kren pat bad ka jingshna ïa ka fly-over u la pyntip ba ïa kane ka kam la shaniah ha ka NHIDCL bad ka kompeni namar na ka liang ka sorkar ki kwah ba ka kam dei ban pyndep katkum ka por ba la buh da ka Ministry of Road Transport.