Yn wanrah da ka Master Plan ha ‘Pdeiñ Mukhim Tourist Spot Wahïajer’: Sniawbhalang Dhar

Jowai, Nohprah, 01: U Symbud Myntri Rangbah ka Sorkar Jylla u Bah Sniawbhalang Dhar ha ka sngi saitjaiñ ula buh mawnongrim ban tei ïa ka surok Pdeng Mukhim, Sohphoh, Mookabeng & Kdohkule ha ka jingjngai kaba 21.255 kilomitar bad kane ka projek ka kot haduh T. 100 klur ba la mang lyngba ka State Road Fund 2024-2005 kaba kynthup ban shna lang ïa ka surok 4 lane ha ki bynta na Ummulong-Nartiang.
Ha kane kajuh ka sngi la pynbna ruh ïa ki kam pynroi ban wanrah hapoh ka shnong Wahïajer West Jaiñtia Hills District kaba la kot T. 2 klur kynthup ïa ka Children Park hajan ka madan Stadium hapoh ka Tourism Department bad la plie paidbah ruh ïa ka Ambulance na ka bynta ka Multi Sports Complex Management Development Society Wahïajer (MSCMDSW).
Shwa kane la pynlong ka jingïalang ha Pdeiñ Mukhim Tourist Sports Wahïajer ba la pynïaid da u Superintending Engineer ka tnat PWD (Roads), Jowai Circle u Bah M.K. Kharnaior ryngkat ka jingdonlang jong u MLA ka Jowai Constituency u Bah Wailadmiki Shylla uba dei ruh u Chairman jong ka MUDA, u MLA u Bah Damanbait Lamare, u MLA barim u Bah Ngaitlang Dhar, u Deputy Commissioner jong ka East Jaiñtia Hills, ki Superintendent of Police jong ka East bad West Jaiñtia Hills bad kiwei kiwei.
U Bah Sniawbhalang Dhar ha ka jingkren ula pynsngew ïa ki kam pynroi kiba ula wanrah hapoh ka Constituency kumjuh hapoh ka Jaiñtia Hills bad ha ka jylla hi baroh kawei. U la ong kum u MLA ula la jop haduh saw sien, nyngkong ula pylleit jingmut ban pynbha shwa ïa ki surok kiba pynïasoh ïa ka Constituency, nangta sa ka Block, ka Police Station Nartiang bad ka Complex ha Wahïajer ban kyntiew ïa ki samla ïalehkai.
U la pyntip ruh hapoh 90 tylli ki shnong jong ka Nartiang Constituency ka dei kaba nyngkong ban ïoh haduh 170 klur ban pynpoi ïa ka umbam umdih, nangta sa Tourism Complex hajan ka pung Thadlaskeiñ.
Ha kane ka sngi u Bah Sniawbhalang ula plie paidbah ïa ka ML72 Rising Society ha Pdeiñ Mukhim Tourist Sports Wahïajer West Jaiñtia Hills District ïa kaba u la kular ban leh da ka Master Plan ïa ka jaka ‘Pdeiñ Mukhim Tourist Sports Wahïajer’ ban khring ïa ki nongwan jngohkai. U ong ka jingwan poi ki nongwan shangkai pyrthei sha ka jylla kan ïarap shibun ban pynkiew ïa ka ïohkam ïohjam.
Ha kajuh ka por ula kyntu ïa ki nongkitkam jong ka ML72 Rising Society ba kin treibha ïa ka kam ban kyntiew shuh shuh ïa ki samla kiba don ka sap ka phong bad ïa ki kynhun treimon sngewbha.