Sep-ei ki mashin bad ki tiar ki tar lada ki paidbah kim treh ban wan shah sumar – Deputy CM

Shillong, Naiwieng 28 : U Symbud Myntri Rangbah ka Jylla Bah Prestone Tynsong ryngkat ka Myntri ka Koit ka Khiah, Dr.Ampareen Lyngdoh ha ka sngi Palei ki la plie paidbah ïa ka First Referal Unit (FRU) bad ruh ban plie ïa u mawnongrim na ka bynta ban kyntiew kyrdan noh ïa ka Pynursla CHC sha ka Sub-Divisional Hospital.
Ïa kane ka prokram la pynlong ha phyllaw jong ka Pynursla CHC ha ryngkat ka jingdonlang u Principal Secretary ka tnad ka Koit ka Khiah u Sampath Kumar, ka Sub-Divisional Officer Pynursla, Kong EL Warjri, ka DHS (MI) Dr. JS Momin, DHS (MCH&FW) Dr. N Kharsohnoh, Rangbah Shnong Urksew Wahpathaw, Bah Archallson Lyngdoh, ki doktor, ki nos, ki ASHA bad ki paidbah nongshong shnong.
Shwa kane, u Symbud Myntri Rangbah bad ka Myntri ki la plie ruh ïa ka Operation Theatre lane ka jaka puid briew na ka bynta ban pynjanai shuh shuh ïa ka jingshakri na bynta ki paidbah ka Riwar Pynursla.
Haba kren ha kane ka jingïalang, u Symbud Myntri Rangbah u la ong ba ki kyrmen ba naduh lashai ka sngi hi, ka FRU kan ai noh ka jingshakri ïa ki paidbah. Haba ïadei pat bad ka jingkyntiew kyrdan ïa ka CHC sha ka Sub Divisional Hospital, u Bah Prestone u la ong ba kane ruh shen ki paidbah kin sa ïoh mad ïa ka jingshakri kumba ki la angnud bad khmih lynti.
“Ka FRU naduh mynta ka sngi kan treikam noh namar ki kamra bad ki tiar ki tar ki la biang. Kaba eh pat lada ki nongpang kim wan, kitei baroh kin long kum ka tdem kaba tang shu beh ka lyer kan sa jah noh,” u la ong.
U Bah Prestone uba dei ruh u MLA ka thaiñ u la ong ki duh mynsiem bha haba ki ïohi ïa ki jingkheiñ ba don tang 65 persen ki longkmie armet kiba wan phah sumar bad wan kha khunlung ha katei ka CHC. “Ki Kmie ki Kpa sngewbha shim kabu ïa kane ka jingpynbit pynbiang ba ka sorkar ka ai kyrpang na bynta ka jingkoit jingkhiah jong phi,” u la ong.
Nalorkata, u pyntip ruh ba ha u snem thymmai kin sa sdang noh ïa ka jingtei thymmai na ka bynta ka Hospital kaba la pynkhreh wat ban kyntiew sha ka 100 jingthiah lada donkam, nangta ki jaka sah jong ki doktor bad ki nos, ban pynbiang ka um, ka bording, ki jingker sawdong ïa katei ka jaka sumar bad kiwei kiwei.
Shuh shuh u ong ba ha ka por ba u don ha ka jingshitom u kum pyrkhat ba long leh nohei lada long Deputy CM ne long MLA lada ym don pat ïa ka jingkoit jingkhiah kaba pura.
Ha kawei pat ka liang, u Symbud Myntri Rangbah u la ong ba kadei ka jingshisha ba ki nongtrei ha ki jaka sumar ki shah kynthoh watla ki trei shitom ban ai ka jingshakri ym tang ïa iwei hynrei da ki phew ngut ha ka shisngi.
“Ha kaba khatduh ki dei ki briew bad kumta hadien ba la dep ban sumar da ki phew ngut, ka don ka jinglong briew ba kum dom lane kum kren khor.” Kumta u la kyntu ïa ki paidbah ba wan phah sumar ba kin don lang ïa kane ka rukom pyrkhat haba ki leit sha ki jaka sumar.
Katba na ka liang ka Myntri ka la ong nang shakhmat ki paidbah na ka riwar Pynursla baroh kawei kim donkam shuh ban leit shaduh Shillong ban leit leh ïa ki test jingpang bapher bapher kumba ki ju leh baroh shi katta.
“Bunsien ki nongpang ki hap ban leit shaduh Shillong ban phah test na ka bynta ban lap ïa ka daw jong ka jingpang. Hynrei mynta hangne hi ki la don haduh 32 tylli ki test kiba phi lah ban leh,” ka la ong.
Ka ong ruh lyngba ka FRU, ki paidbah ka thain kin ïoh ïa ka jingsumar kaba long baroh 24 kynta ha ka shi taiew ha ki liang baroh khlem da donkam shuh ban leit sha kiwei ki jaka sumar kiba don sha Shillong.
Shuh shuh ka pyntip ruh ba nangne shakhmat katei ka jaka sumar kan lah ban ai ka jingsumar kaba kham paka haba ïadei bad ki longkmie ba wan kha khunlung namar ki la don ruh ïa ka jaka puid lane kata Operation Theatre kaba la biang la bit.
“Ngi kyrmen ba ki nongpang khamtam ki longkmie ba kha khun kin ym donkam shuh ban leit sha ki jaka sumar ba jngai banleit kha khun. Mynta wat ka jaka pynlang snam ruh ka la long bad shen yn sdang noh. Kumta, kum ka tnad ngi kwah ban ïohi ba ka jingtrei shitom jong u Symbud Myntri Rangbah kan ym syrwa kai,” la bynrap biang ka Myntri.
La pyntip ruh ba mynta katei ka Hospital kan don san ngut ki doktor kynthup ïa u doktor Ayush bad mynta kin ïoh shuh sa 9 ngut ki nurse nalor kiba la don lypa.
Ka ong ruh ba ki khmih lynti ba nangne shakhmat ba kin ym ïohi shuh ba ka jingïap ki khunlung ha ka por ba kha kan ym don shuh.
“Ka long kaba sngewsih ban ïohi ba tang 65 ngut na ka 100 ki longkmie kiba wan kha khun ha ki hospital katba kiwei pat ki dang kha hi ha iing. Nga kyntu ïa ki VHC, ki nos bad ki ASHA ba kin pynshai paidbah ba lada ki kha ha ki jaka sumar kan pyntikna ba ki khun kin im bad kin heh kin san.”
Ka Myntri ka la ong ruh ba ki sngewsih ban ïohi ba wat kiba ai tika ruh ki dang duna namar haduh mynta ka dang poi tang 76 persen bad kane ka dang donkam ban pynbha shuh shuh. Halor kane ruh ka ong ba ki kwah ban ïohi ba ka jingai tika ïaki khunlung ba hapoh 7 snem kan kot sha ka 100 persen.