Shillong, Naiwieng 28: Ka tnat pule puthi jong ka sorkar jylla ka la ïasoi ïa ka MoU bad ka National Stock Exchange of India Limited (NSEIL) ha ka jingïadonlang u Myntri Rangbah ka jylla u Conrad K Sangma, nangta u Rakkam A Sangma Myntri ba khmih ïa ka tnat Pule Puthi ka sorkar jylla, u Bah D P Wahlang IAS Chief Secretary ka sorkar jylla, u Vijay Kumar Mantri IAS Commissioner & Secretary bad kiwei pat ki ophisar jong ka tnat pule puthi ha kaba kane ka jingïasoi soskular ka thmu ban ai ka jingïarap pisa halor ka pule puthi (financial literacy), ban ai ki jinghikai haba ïadei bad jingshngaiñ ha ka ïew ka hat bad kiwei pat ki prokram ai jinghikai ha kylleng ka jylla jong ka Meghalaya.
Kane ka don ruh ka jingthmu ban pynmih ki lad ïohkam ïohjam na ka bynta ki samla ha ki thaiñ nongkyndong bad kiba sah ha sor haba ïadei bad ki kam kynshew pisa, ka Financial Services and Insurance Sector (BFSI) ka ban pynkupbor bad ban ai ka rynsan na ka bynta ban kyntiew ïa ki sap ki phong na ka bynta ki samla ha ka jylla.
Kane ka prokram ka thmu ruh ban aibor ïa kiba ïoh myntoi da ka jingkongsan ha ka jingnang jingtip, ka jingai jinghikai bad kumjuh ruh ki sap lyngba ka financial literacy, ki capital market, mutual fund, insurance sector, bad kiwei kiwei, da kaba ai ki jinghikai ka ban lah ban pynsuk da ka NSEIL ban ai ka rynsan na ka bynta kiba ïoh myntoi ban pynïar ïa ki sap bad haba phai kan pynlah ïa ki ban ïoh kum kine ki lad na ka bynta ka jingthmu ban wanrah ïa ka ïohkam ïohjam ha ka BFSI sector.
Baroh kiba ïoh jingmyntoi kiba la poi sha ka thong ka jingjop kin ïoh ki khusnam da ki syrnot hadien ba ki la pyndep ïa ki course ne program jong ki kumba la maitphang da ka NSEIL.
Ïa kane ka MoU la soi da u Director of Higher and Technical Education ba la mihkhmat ïa ka tnat Pule puthi ka sorkar jylla bad Chief Business Development Officer, National Stock Exchange of India Limited.
