Shillong, Jylliew, 07: Ka Sorkar Jylla ka la pynkhreh ïa ka song pisa kaba T.4700 klur na ka bynta bei sha ki Natural Resource Management Committee (NRMC) kiba don ha ki shnong bapher bapher ka jylla na ka bynta ban ïada ïa ki khlaw ki btap, ki tyllong um bad ïa ka mei mariang.
‘Mynba ngi la pynsdang ha u snem 2018, ngi la ïakren shaphang ka Natural Resource Management (NRM) bad ngi sngewthuh ba ngi donkam ban don ïa ka polisi na ka bynta ka um namar ba khlem kane ka jingthmu yn ym lah ban pynurlong. Namarkata ngi la sdang ka Water Policy, hynrei ngi lap ba ka pla Tyngka bad ka pisa kam biang satia ïa ngi ban bei jingïarap pisa na ka bynta ki projek bapher bapher ba ngi la buh hakhmat. Namarkata ngi la sdang ban ai jingïarap ha ki projek bapher bapher,” ong u Myntri Rangbah ka Jylla u Conrad Kongkal Sangma haba kren kum u Kongsan ha ka sngi pynkut ïa ka jingrakhe ïa ka World Environment Day kaba shitaiew ha ka jingïalang kaba la long ha U Soso Tham Auditorium, Shillong ha ka sngi Baar.
U la pyntip ba ka Sorkar Jylla ka la pynkhreh ïa ka song pisa T.4700 klur ban bei jingïarap ïa ki projek na ka bynta ka Natural Resource Management hapoh ka jylla.
U Myntri Rangbah u la kdew ruh ïa ka jingdonkam jong ki shnong ki thaw ban ïatreilang bad ïa ki kamram jong ka Natural Resource Management Committees ha ki shnong nongkyndong.
“Ngi don ïa ki Natural Resource Management Committees ha ki 6500 tylli ki shnong. Ka jingtrei shitom jong ka Sorkar, ka thong kaba ngi don, kan ïarap ïa ngi ban rung sha ki shnong, khnang ban pun jingkieng da ki prokram bapher bapher ba la pyntreikam bad ba ngi dup lah ban kynjoh sha ka thong,” u la ong.
U Myntri Rangbah u la kdew ruh ïa ka kamram jong ka Technology and Innovation ban pynkhreh ïa ki prokram bapher bapher hapoh ka NRM.
U la ïathuh ruh ba ki prokram kiba ka Sorkar ka la pynkhreh ka long halor ka Payment for Ecosystem Services (PES) kaba thmu ban ïada ïa ki tyllong um, ïa ki khlaw na ka jingshah pynjot ha ki shnong ki thaw. Kane ka projek, nyngkong eh la pyntreikam na ka bynta ka Ganol Catchment Area jong ka West Garo Hills District bad ïa kaba la thmu ban rah sha ki shnong nongkyndong ban pynneh pynsah ïa ki khlaw ki btap ha kaba yn ïarap bujli ïa ki paidbah.
“Ym pat don kano kano ruh ka jylla hapoh ka ri ka ban pyntreikam kane ka prokram kumba ka Jylla Meghalaya ka la leh. Kane kan long ruh ka nuksa na ka bynta kiwei pat ki jylla bad ka thaiñ bad nga sngewshngaiñ ba kane ka dei kawei thong ban ïada ïa ka mariang kaba ngi im,” u la ong.
U Myntri ka tnat Forests and Environment u James P. K. Sangma haba kren ha kane ka sngi u la ong ba ka teknoloji ka la long ka bynta kaba kongsan bha ban ïada bad ban pynneh pynsah ïa ka mariang.
U la ïathuh ba ka tnat Forest and Environment ka la pyndonkam da ki bor jogn ka mariang ban ïakhun pyrshah ïa ka jingeh jong ka mariang kaba la jot na ka jingmushlia jong u khun bynriew.
Shuh shuh u la ong ba kane ka tnat kan ïatreilnag bad ka tnat Pule Puthi ban pynrung ïa ka lynnong pule Climate Change ne ka jingkylla ka suiñ bneng ha ki kot skul.
Ha kane ka jingrakhe kaba shi taiew ba la pynkut ha kane ka sngi u Myntri Rangbah bad ki kynrem ki lyndan ki la pyllait paidbah ïa ka Forest Management Plans.
U Myntri Rangbah u la pyllait paidbah ruh ïa ka jingrwai ‘Environment Day” 2022 bad ïa u NRM Mascot
U la sam ruh ïa ka khusnam State NRM sha ki shnong kiba hap hapoh ka NRM Committee.
Hadien kane, u Myntri Rangbah u la ïakren bad ki khynnah skul ha ka jingleit jngoh ïa ki shlem pyni nam ïa ki jingshna ba la buh da ki Eco Club na ki skul bapher bapher.
