Shilong, Naiwieng 22: Ka sorkar jylla ka la thung ïa ka special committee ban khmih bniah biang ïa ka Meghalaya Minor Minerals Concession Rules (MMMCR), 2016 ban pynsuk ïa ka jingdonkam ban ïoh ïa ka kam tih marpoh khyndew ha ka jylla.
Haba ïathuh ïa kane hadien jong ka jingïalang ha ka sngi Thohdieng u Symbud Myntri Rangbah ka jylla u Bah Prestone Tynsong u la ong, “Ka committee ba la thung da ka tnat forest ka long ban khmih bniah biang ïa ki kyndon ka MMMCR (Mines and Minerals (Development and Regulation) (MMDR) Act, 1957, ngi don ruh shi bynta jong ka aiñ, ba la tip da ka minor minerals kum ka jingtih khyndew, ka jingkhlong maw bad kiwei, kumta na ka liang ka sorkar ka la thaw ïa kane ka committee.”
U Bah Tynsong u la pyntip ruh ba u la bthah ïa ka tnat forest bad ka mining and geology ba kin khmih bniah biang ïa kane ka kam. “Ha kino ki bynta ba ngi lah ban pynsuk ïa ki kyndon na ka bynta kito kiba pan jingbit ha ka kam tih maw tih shyiap.”
Haba kylli na ka liang u Symbud Myntri Rangbah u la ong, “Balei ki kam beaiñ ki jia ka long namar kito ki longïing kiba kyrduh ki trei ïa ka kam tih maw tih shyiap ki kwah ruh ban ïoh license hynrei ka kam ka long kaba jrong ban ïoh ïa kane kumta la buh noh da ka special committee ban khmih ïa kane ka kam na ka bynta kito kiba kwah ban aiplai ba wat kito ki nongtih maw kiba rit ruh kin lah ban pan jingbit.”
Ha kane ka jingïalang la ïashim bynta lang da ki dkhot ka joint action committee kiba tih maw tih shyiap na ki distrik bapher bapher jong ka jylla.
Na ka liang u Bah Tynsong, u la ong ba shen yn sa khot biang ïa kane jingïalang haba ïadei bad kane ka kam.
