Nongstoiñ, Jylliew 7: Ka jingshah kem jong ki hynriew ngut ki rangbah na Gizang Salbari kiba la tip kyrteng kum u Kribin Sangma Headman, Demarson Marak Deputy headman, Pairosh Marak Secretary, Brejion Sangma EC member, Raisend Marak EC member bad u Gilseng Shira EC member, kiba la shah kem ha ki pulit Assam halor ka ejahar ba la mudui da u Beckine G.Sangma ha Hahim Border Out Post, ka la pynbitar ïa ki paidbah nongshong shnong.
Halor kane ka bynta, na ka liang ki nongïalam ka Hynñiewtrep Youth Council West Khasi Hills ha ryngkat ki dkhot jong ka Mawshynrut Circle, hynne ka sngi ki la leit ban ïakynduh ïa u bah P.D.Sangma Deputy Commissioner ka West Khasi Hills, ban kyntu ïa u ba un shimkhia lem ban ïakren bad u DC Kamrup ba un phah pyllait noh ïa kitei ki hynriew ngut kiba la shah kem. Ha katei ka jingleit ïa kynduh jong ki na ka liang u DC u la kular ba un sa ïakren ïa u DC jong ka Kamrup ba un leh ïa kaba don kam.
Katkum ki jingtip ba la ïoh lum mynta ka sngi, la ong ba hadien ba ki pulit ki la kem ïa kitei ki hynriew ngut, ki la register da ka mokutduma katkum ki kyndon jong ka Boko P.S case Number 257/22 Under Section 147/148/ 149/448 306/506 of the Indian Penal Code bad la phah noh ïa baroh hynriew ngut sha Jail Guwahati.
Halor ka jingshah kem jong kitei ki hynriew ngut, na ka liang ki paitbah shnong Gizang bad Salbari, ki la dawa ba ka sorkar Meghalaya bad ka sorkar Assam, ba ki dei ban ïakren bad tuklar mardor ban pyllait noh ïa ki. Lada ka sorkar Assam kam pyllait kim banse ban ïaid da kiwei pat ki lynti bad ka lah ban buh ha ka jingeh kaba khraw ïa ki paitbah ha katei ka thaiñ.
