Wat pynkylla jubor ïa ka CTI Byrnihat sha ka Industrial Area, lada leh da ka bor, ngin leh da ka bor: Ardent

Nongpoh, Naiwieng 15: Ki nongïalam jong ka Voice of the People Party (VVP) ha ka sngi Thohdieng hapoh ka jingïalam jong u President Bah Ardent Miller Basaïawmoit ki la leit ban jurip kynsan ïa ka Conservation Training Institute (CTI) kaba don ha Byrnihat bad pyrshah ruh halor ka jingthmu leh sopsop da ka Sorkar Jylla ban pynkylla noh sha ka Industrial Area bad ban pynkynriah noh ïa ka ophis CTI sha Mawkhanu.
Ha ka jingleit jurip la synran lang da u MLA ka Mawlai u Bah Brightstar Marbaniang, u MLA ka Mawryngkneng u Bah Heavingstone Kharpran ryngkat ka jingdon lang kiwei kiwei ki nongïalam ka party.
U Bah Ardent bad ki MLA ki la leit ban jurip kylleng ki jaka treikam bad ïa ki sawdong sawkun jong ka CTI ban wad bniah halor ka jinglong jingman ka jaka sorkar kaba hap ha ka jingpeit ka tnad Soil and Water Conservation ka Sorkar Jylla.
Haba kren sha ki lad pathai khubor, u Bah Ardent u la ong ba ka VPP horkit hordang kan ym ailad ban pynkylla ïa katei ka jaka sha ka Industrial Area bad lada ka sorkar ka leh da ka bor ka VPP ryngkat ki paidbah ruh kin hap ban pyni da ka bor.
U la ïathuh ruh ba ka party ka ladep ban aiti da ka jingthoh sha ka Sorkar ban pynshah halor kane ka jingthmu ban pynkylla Industrial Area ïa ka CITI ha Byrnihat hynrei haduh mynta ka VPP kam pat ïoh jubab satia.
U la ong ba kum u MLA u ladep ban kren ne rah ïa kane ka mat ha Iingdorbar Thawaiñ ban pyrshah jur ïa ka jingthmu jong ka Sorkar.
Ka khubor ba shai na ka VPP ka la pynpaw paidbah hadien ka jingjurip ka long ba ka VPP kan ieng pyrshah bad da leilei ruh kin nym ailad ïa ka CTI ba kan kylla long ka Industrial Area bad ka VPP kan ieng pyrshah ïa kane ka jingthmu jong ka Sorkar bad la pynpaw ruh ba lada ka sorkar kan ïaid shakhmat ka party VPP ka hap ban pyrshah lada dei da kano kano ka lynti ban ïa pyrshah ryngkat ki paidbah, ong u Bah Ardent Miller Basaïawmoit.
Hadien ka jingjurip ïa ka CTI, u Bah Ardent u la leit ban ïakynduh sa ïa ki paidbah ha Byrnihat ban pynshai sha ki paidbah halor kane ka jingthmu jong ka Sorkar ban pynkylla Industrial Area ïa ka CTI bad u la pynshai ruh ba ka VPP kan ieng pyrshah bad u la kyntu ruh ïa ki paidbah ban ïa ieng ryngkat na ka bynta ban pyrshah ïa katei ka jingthmu ka sorkar ban pynlong ïa ka CTI kum kata ka Industrial Area.
Kum ban pynkynmaw, ka CTI Byrihat ka dei ka jaka kaba ki ai jinghikai ïa ki nongtrei sorkar na ki tnad bapher bapher ha kaba ka jingheh ka don haduh 200 akar bad nalor ka jaka kum ka jaka ai jinghikai, ka don ruh ka Rubber Plantation bad ki ophis treikam, ki jaka sah jong ki nongtrei Sorkar bad ïa ka CTI la ker da ki khlaw ki btap suda.