Mawreng, ‘Naiwieng 14: Ka Nangpynroi Village Organisation, Mawreng hapoh ka jingïalam ka kong L. Sohlang kum ka President bad ka kong Y. Langstieh, Secretary ka la ïoh ban rakhe ïa ka jingdap 4 (saw) snem jong ka Mawreng, East Khasi Hills District.
Ha kane ka sngi u Bah Sherbor Mawlong, MDC ka Nongspung Sohïong Constituency u la long kum u kongsan bad u Bah Staising Kharbteng kum u symbud kongsan.
Haba kren ha kane ka sngi u Sherbor Mawlong, MDC ka Nongspung Sohiong Constituency u la ong ba dei ka jingaiti bad len-lade khlem pyrkhat ïa ka jingmyntoi shimet ba kum ki longkmie ki la lah ban pyntyllun ïa ki kam jong ka VO na ka por sha ka por.
U Bah Staising Kharbteng ha ka jingkren jong u ula ong ba ki longkmie ki don ka bynta kaba khraw ym tang ban kyntiew ïa ka ïoh ka kot hynrei ban weng ruh ïa ki jingsniew ha ka imlang sahlang.
Ka kong Santalin Wahlang, Cluster Coordinator ka NRLM ba dei peit ïa kane ka thaiñ ka la ong ba dei ka jingïaieit bad ïatreilang ba kum ka VO ki lah ban ïai bteng ïa ki kam bad wanrah ïa ka jinglong kawei.
Ha kane ka sngi la ïoh ruh ïa ka jingpynshai halor ki jingma jong ki jingdih sniew na u bah Raymond Kurkalang iba long u Officer Incharge jong ka Mawngap Police Station.
La ïoh ruh ïa ka jingkren na u Bah Highly Sohlang, Secretary Shnong bad kiwei kiwei bad la pynshitrhem ïa ka jingrakhe da ki jingrwai bad jingshad.
