Nongpoh, Naiwieng 14: Ki bor pynïaid jong ka Savio Secondary School Umjarasi, Ribhoi District, ryngkat bad ki Nonghikai, mynta ka sngi ki la rakhe ïa ka Children’s Day, kaba la ju rakhe ha kylleng ka ri man ka 14 Naiwieng ban kynmaw burom ïa ka sngi kha jong u President ba nyngkong ka Ri, u Pandit Jawaharlal Nehru, uba don ruh ka jingïeid kaba jan bha bad ki khynnah.
Ha kane ka sngi, ka skul ka la pynlong ruh ka jingrakhe kaba phuh ba phieng ha ryngkat ka put ka tem, ka rwai ka jingshad bad ka jingmuja ryngkat bad ki khynnah skul bad la ïoh ruh ban pynlait paidbah ïa ka podium ba thymmai jong ka skul ba la ai sngewbha da u Bah Rocky Marweiñ uwei na ki samla Rangbah ka Ri-Bhoi, bad kumjuh ruh ka Library ba la kyrshan da ka Bharti Airtel Foundation.
Nalor kane ka jingrakhe, ka skul ka la kynmaw burom ruh ïa ka sngi kyrpang jong ki Kmie ki Kpa, bad la leh burom kyrpang ruh ïa ki khynnah Class X ha shuwa ba kin mih noh na ka skul ban bteng ïa ki jingpule sha ki kyrdan ba kham halor.
Ha kane ka sngi kyrpang la donlang u Bah Rocky Marweiñ kum u kongsan, ryngkat ka kong Michelle Shadap, Supervisor jong ka Bharati Airtel Foundation kum ka symbud kongsan ha ka jingdonlang ka kong Margret Jyrwa, Headmistress ka skul, ki nonghikai, ki kmie ki kpa bad ki khynnah skul.
