Kular u Myntri ka Sorkar Pdeng ban weng ïa ki kynrum kynram ha skulbah NEHU

Shillong, Naiwieng, 12: U Myntri Rangbah ka Jylla u Conrad Kongkal Sangma ha ka sngi Baar u la ïathuh ba u Myntri ka Sorkar Pdeng uba khmih ïa ka tnat Pule Puthi u Dharmendra Prasad u la kular ban wad ïa ki lad ki lynti ban weng noh ïa ki kynrum kynram ha skulbah North-Eastern Hill University (NEHU), hadien ba ki samla pule ki la pynlong ïa ka jingïakhih shah thngan ba khlem pud sngi kaba la kynjoh mynta la shi taiew kynthih.
Ha ka rynsan Twitter, u Conrad Sangma u la thoh, “nga la ïoh ïakren lyngba ka telephone ïa u Myntri ka Sorkar Pdeng uba khmih ïa ka tnat Pule Puthi u Dharmendra Pradhan, uba la ai ka jingkular ban wad ïa ki lad ki lynti ban pynkut ïa ki kynrum kynram ha NEHU. Nga ai khublei ruh ïa u Lat ka Jylla uba la tuklar ïa kane ka kam.”
Kane ka jingpyntip ka la jia tang ar sngi hadien ba u Myntri Rangbah ka Jylla u Conrad K Sangma u la pyntip sha u Myntri ka Sorkar Pdeng uba khmih ïa ka tnat Pule Puthi Dharmendra Pradhan halor ka jingjia bad ka jinglong jingman ha skulbah NEHU bad kyntu ba un wad ïa ki lad ki lynti ban weng ïa kine ki jingeh. Ha kajuh ka por u Myntri Rangbah u la ai khublei ruh ïa u Lat ka jylla u C H Vijayashankar uba la shim khia bad tuklar halor kane ka jingkynrum kynram ha NEHU.
Ki samla pule ka skulbah NEHU ki la pynlong da ka jingshah thngan ba khlem pud sngi bad khang dam syndon ïa ka skulbah NEHU. Ka jingïakhih ka la mih namar ka jingbym urlong ki jingdawa ba la pynsngew da ka North-Eastern Hill University Students’ Union (NEHUSU), kaba kynthup ïa ka jingweng kam ïa u Registrar u Omkar Singh bad ïa u Deputy Registrar u Amit Gupta, ban thung ïa ki Pro Vice-Chancellor ha Shillong bad ha Tura Campus.
Ka jinglong jingman ha skulbah NEHU ka la heh shuh shuh hadien ba ka ingsah jong u Vice-Chancellor ka skulbah NEHU u Prof Prabha Shankar Shukla kaba don hapoh ka phyllaw jong ka NEHU ka la shah pynjulor ha ki runar ki bym lah ban tip ha ka step phyrngab sngi u Blei ha ka por kumba 2:00 baje mynstep.
U Prof. Shukla ar sien kynthih u la khot ïakren ïa ki nongïalam jong ka NEHUSU bad ka KSU NEHU Unit bad kular ruh ban thaw ïa ka Inquiry Committee ban tohkit bniah halor ka jingthungkam ïa u Registrar bad ïa u Deputy Registrar.
Hynrei na ka liang jong ka NEHUSU bad ka KSU NEHU Unit ki la kyntait war ïa ka jingkhot ïakren da kaba kam, “ka jingïakren bad ki kam kiba u Vice Chancellor u leh,” kim ïahap satia.