Ai khublei ka AHPUF ïa u Steve Jyrwa uba jop ïa ka ‘India’s Best Dancer Season 4’
Jowai, Naiwieng 11: U Steve Jyrwa na ka jylla Meghalaya ula long u nongjop ne uba la ïoh ban rah ïa ka nam lahduh ha ka jingïakop shad ba paw jong ka Ri kaba la tip kum ka ka India’s Best Dancer Season 4, ha ka jingïakhun kaba khatduh ne ka Grand Finale kaba la long ha kane ka sngi U Blei.
Ha ka jingïadei bad kane ka jingwan rah nam bad burom une u samla na Shillong uba 17 snem ka rta na ka liang ka seng All Hynniewtrep People United Front (AHPUF) lyngba u President jong ka u bah John Phawa, ka la khublei kyrpang bad ai ka jingïaroh ïa u samla Steve Jyrwa bad kum juh ruh ka seng ka kit bok kit rwiang ïa une u samla ba un nang ïaid shuh shuh sha khmat bad khamtam ban kdew lynti ïa kiwei pat ki para samla jong ka ri bad ka jait bynriew.
Ha kane ka jingjop jong u Steve, ula ïoh ban rah ïa ka song pisa kaba 15 Lak tyngka kumjuh ruh ka kali Maruti Swift, u Steve u la ïoh ruh ka jingïaroh na ki khlur ka Bollywood ïa ka sap shad kaba u don. U Steve u la shah khot ruh ban don bynta ha ka wei ka phlim Bollywood ka ban sa pynmih shen.
Ha ka Grand Finale u Steve u la pynliem ïa kiwei pat ki hynriew ngut kiba kynthup ïa u Harsh Keshri, Nextion, Nepo, Akanksha Mishra ka Akina bad u Aditya Malviya.
Ha katei ka jingïakop final ia u Steve la wan ban sakhi ne synranlang ïa u da kiba ha ïing ha sem jong u na Shillong.