Shillong, Naiwieng 11: Ka Reserve Bank of India (RBI) ka la shaiñ kuna da ka pisa kumba T.1 lak ïa ka Tura Urban Cooperative Bank Ltd ba ka khlem lah ban bud ïa ki kyndon jong ka RBI Supervisory Action Framework (SAF).
Katkum kyrwoh ba la phah da ka RBI ka la ong ba katkum ka jingjurip ha kaba ïadei bad ka pisa pilaiñ jong ka Tura Urban Cooperative Bank Ltd kumba ka la long ha ka 31 tarik jong u bnai Lber, 2023, ka la pynpaw ba ka bank ka la pynlut ïa ka pisa kaba long shalor jong u pud kaba dei ban long T. 25,000 ha ka shisnem khlem da la ïoh ka jingmynjur jong ka RBI bad ka la ai ïa la ka ram kaba la tam ïa ka jingbthah jong ka SAF.
Na ka liang ka RBI ka la ong ba baroh kine ki jingshaiñ kuna ki la long na ka daw jong ka jingbym ïaid beit ïaid ryntih jong ki kam bad kine kin ym ktah ïa ka kam sei ne thep pisa hapdeng ki bank bad ki customer jong ka.
Halor kane ki la don ruh sa kumba 4 tylli ki cooperative bank kiba don ha Gujarat bad Maharashtra kiba la ngat ha kane ka jingshah shaiñ kuna naba ki khlem ïaid katkum ki kyndon ba la buh da ka RBI.
