Lada jia eiei kaba sngewsih ïa ki samla pule u VC hi un hap bah khlieh: President KSU

Shillong, Naiwieng, 08: U President ka Khasi Students Union (KSU) u samla Lambokstarwell Marngar ha ka sngi Thohdieng u la kynthoh tyngeh da kaba ong, ‘lada jia eiei kaba sngewsih ïa ki samla pule (ka skulbah NEHU kiba ïakhih da ka jingshah thngan ba khlem pud sngi) u Vice Chancellor jong ka skulbah North Eastern Hill University (NEHU) Prof. PS Shukla un hap ban shim ïa ka jingbahkhlieh.
“Ka rai ka dei kaba la shim da kine ki samla pule bad kum ka seng ka ai ka kti ka mon ka kti ka diang. Lada ka por ka donkam ban tuklar, ieh ïa kata ka por, kiei ki lad ba ngin sa pyrkhat ba ngi ban leh. Lada jia kano ka jingjia kaba sngewsih ïa kine ki samla pule kiba shah thngan ka jingkitkhlieh kan dei beit ha u Vice Chancellor. U hap ban kitkhlieh namarba baroh ka dei na ka daw jong u bad kane ka pyni ba lehse u kwah ban pynhiar arsut ïa kane ka skulbah bad um kheiñ snep hi ruh ïa ka jinglong jingman bad ka kynrum kynram hapoh kane ka skulbah. Ïa kata ngim lah ban tip hynrei tang ma u, uba lah ban tip,” la u nongïalam ka KSU ha ka jingïakren bad ki lad pathai khubor.
“Ha ka jingshisha u VC u la dei ban sngewlehraiñ ym da donkam ban dawa hiar shuki hynrei u la dei ban hiar shuki hi kaba pyni ïa ka jingbym bit jong u ban treikam ha kane ka skulbah,” la bynrap u samla Marngar.
Haba kylli, u la ong ba lada ka por ka donkam ban leit pynsngew sha u Lat ka Jylla u C.H Vijayashankar ka KSU kan sa leh la ka jong ka bynta ha ki sngi ban sa wan.
U la ong, ba ka jinglong jingman hapoh kane ka skulbah kam shuh tang kane ka jingjia kaba mynta. “Naduh ba la shimti une (Prof. PS Shukla) kum u VC ngi la shu ïohi ba ki mih tang ki kynrum kynram. Kane ka pynlong ïa ngi ba ngi don ka jingsngew ba ngi don ïa kane ka skulbah hapoh kane ka jylla jong ngi. Ka jinghiar arsut jong kane ka skulbah ka la pynlehraiñ ruh ïa ka jylla ha kajuh ka por.”
U la ong ruh ba ka jingpynlong ïa ki samla pule ban poi haduh u pud ka jingshah thngan ka dei ka jingkuman bad ka jingbym ler treikam jong une u VC ba mynta.
“Ngi la ïohi ïa ki mat jingdawa jong kine ki samla pule kiba don 14 tylli eiei bad ngim shym la ïohi ba wat kawei ruh ka jingdawa un pynurlong ne u kwah ban thet kti,” la pynpaw u President ka KSU.
U la ïathuh ba kum u nongïalam ka KSU ryngkat bad ki dkhot ki la leit jngoh ïa ka samla Naphisabet Marweiñ ba la shah sumar ha Civil Hospital, Shillong.
“Haba ngi la leit jngoh ïa i, i la kham biang ka koit ka khiah, hynrei ka mynsiem ba shynrang bad ka jingmut jingpyrkhat jong i, i la ong ba ngi kwah ba ka skulbah kan ïaid shakhmat bad ngin shah shitom ma ngi mynta na ka bynta ka lawei jong kane ka skulbah bad i ong, tang shu pyllait na Civil Hospital ngan sa bteng biang ïa ka jingshah thngan ban pynurlong ïa ka jingdawa bad ka jingthrang jong ki samla pule.”
“Wat ki arngut ki samla pule kiba la shah pynkit sha Civil Hospital ruh kajuh ka khubor ki ai bad tang shu pyllait na Civil kin sa wan bteng biang ïa ka jingshah thngan,” la ïathuh u samla Marngar.
Haduh mynta, ki don lai ngut ki samla pule ba la tlot bad kiba la shah pynkit sha Civil Hospital ba kynthup ïa ka samla Naphisabet Marweiñ, u General Secretary ka KSU NEHU Unit u samla Kevin Wanrap bad u dkhot ka KSU NEHU Unit u samla Morningstar Suting.
Ka jingïakhih jong ki samla pule da kaba shah thngan khlem pud sngi ka la kynjoh mynta sha ka 72 kynta.
Shwa kane, ki nonghikai ka skulbah NEHU ki bad ki samla pule na ka USTM, RIST, MGU Ribhoi, Manipuri Students Union bad ki shnat treikam ka KSU ki la leit ban ai mynsiem ruh ïa ki samla pule kiba shah thngan ha phyllaw ka skulbah NEHU.
Ha ka por janmiet, ki samla pule ki la pynlong ruh ka jingthang mombati bad ka jingïalang balyngkot ban pynrem ïa ka jingkuman jong u Vice Chancellor u Prof. PS Shukla.