Donkam ka jingïalong shipara, ong u RG ka High Court ha ka 100 drum Wangala Festival

Shillong, Naiwieng 08: Ka jingrakhe ïa ka tamasa Rugala ha ka sngi kaba ar kaba dei ruh ka tamasa kaba 48th Hundred Drums Wangala Festival la pynlong hapoh ka Garo Heritage Village ha Wangala A’dam, Chibragre. U Registrar General, ka High Court ka Meghalaya u Bah E Kharumnuid, MHIS u la long u kongsan ha ka jingdonlang kiwei ki kynrem ki lyndan kiba la shah khot sngewbha.
Lah ban kdew ba shisngi shwa ban pynlong ïa ka Wangala, ka la don ka jinglehniam kaba la khot ka Rugala ba la leh da u Nokma uba dei u khlieh nongsynshar shnong bad ha ka jinglehniam, ka la don ka jingtyrwa ïa ka rice-beer kaba kongsan da u khaw ba la shet bad ki jhur ba la ai sha ka Misi Saljong, kum ka nongai kaba khraw.
Haba ai ka jingkhublei sha ki jaitbynriew Garo ha kane ka sngi u Registrar General, High Court ka Meghalaya, u Bah E Kharumniud u la pynpaw ka jingïaroh ïa ki dkhot ka Committee jong ka Wangala kaba u la ïoh ban sakhi ïa kane ka tamasa. Haba ong ba kane ka dei ka jinglehniam ainguh, u la ong ba manla uwei ne kawei na ki nongshong shnong dei ban ainguh ïa baroh ki jingkyrkhu ba la ïohpdiang bad bynrap ba kane ka jinglehniam ainguh kan kyntiew ïa ka suk ka saiñ, ka jingsngew shipara bad ka jingkiew ka jaitbynriew Garo bad kumjuh ruh ki nongshong shnong jong ka jylla Meghalaya.
U la pynpaw ruh ka jingkyrmen ba kane ka tamasa kan nangkiew shuh shuh shalor ha ki por ban sa wan bad ban pynkhriang ïa ka khubor jong ka jingieid bad ka jingsngew shipara hapdeng ki kynhun bapher bapher.
Katba u Chairman, ka Hundred Drums Wangala Festival Committee, u Ronald Rikman Sangma u la ong ba ka jingpynlong ïa kane ka tamasa kaba khraw jong ki jaitbynriew Garo kan long ka kam kaba sngew sarong bad ka long ruh kum ka jingpynneh pynsah ïa ka jingriewspah ka kolshor ki paid Garo sha kiwei pat.
U la pyntip ba ki kam jingtei hapoh ka Garo Heritage Village ki la nang ïaid shaphrang katkum ki kyrdan, bad ong ruh ba ki dang don bun ki kam kiba dang hap ban leh ha ki sngi ban wan bad u la pynpaw ruh ka jingai khublei ïa ka sorkar jylla halor ki jingïaibteng ban kyrshan bad ban peit shakhmat ïa ka sorkar ba kan dang ïaibteng ban ai ki jingkyrshan ha kine ki sngi ban wan ban lah pyndep noh ïa kane ka project.
Nalor ka rugala ceremony, ha ka sngi kaba ar jong kane ka tamasa la sakhi ruh ïa ka jingpynlong ïa ka Folk Song Competition ba la pynlong da ka jingthmu ban kyntiew ïa ka put ka tem deiriti jong kane ka jaitbynriew riewlum Garo.