Nongstoiñ, Naiwieng 08: Ka West Khasi Hills ka dei ka District kaba kynrei bha ki jaka jngoh kai kiba itynnad haduh katta katta, hynrei na ka daw jong ka jingbym don surok bad ka jingtlot jong ka tnad shangkai, ki jaka ba itynnad ki shu sah shrah kumto kumba ki long haduh mynta.
Haduh mynta hi dei tang ka Dewlynnong Nongkhnum ba ka tnad jngoh kai ka la pyntreikam ha ryngkat ka jingïatip lang bad ka sorkar. Kiwei ki long tang u Lum kyllang, u Lum Mawthadraishan bad ki jaka ha Mawphanlur. Haba phai sha kiwei pat ki jaka jngoh kai kiba kham jan na ka sor Nongstoiñ kum ki ar tylli ki bynta kiba don ha ka wah Rwiang kum ka thaiñ Mawsetlun, ka kshaid Thupthup bad ka thwei Koh Langheit kaba don haneng jong ka kshaid Thupthup ki dei ki jaka kiba itynnad haduh katta katta. Tangba ym don surok ban poi sha kine ki jaka.
Ka kshaid Thupthup ka dei ka kshaid kaba don ar bynta kawei ka bynta ba shapoh bad kawei pat ka bynta ba kham sha jrong. Ka kshaid kaba don ha ka bynta ba kham shapoh ka kham lyngkot bad ka jing kynjang ka lah ban don kumba san phew phut ei ei. Hynrei ka kshaid kaba don ha ka bynta ka kham sha jrong pat ka kham jrong bad ka jingkynjang kam duna ïa ka hynriew haduh hynñiew phew phut.
Katei ka kshaid ka noh rynphum na jrong ki mawramsong bad ha ki snem ba kham mynshuwa man ka por lyiur, ki briew ki ju leit tong ïa ki doh jei kiba kiew na katei ka ka mawsiang da kaba teh da u tyllai na ka met bad hiar sha marshiteng ki sa pynap da ka jar bad tynruh da ki dieng ha kaba shisien tan ïa ka jar ki ju ïoh shiphew haduh khatsan kilo.
Kham shaneng na katei ka kshaid ka don kawei ka thwei kaba pyllun bad kaba ïar bha kaba la ju khot ka thwei koh Langheit. Ha ki snem kiba kham mynshuwa katei ka thwei ka long kaba itynnad bha namar baroh sawdong la ker da ki khlaw, hynrei mynta u snem la lap ba mar shilliang jong katei ka thwei la dap da u shyiap bad ka la kylla long thik kum ka beach ha Nongkhnum.
Hynrei kaba sngewsih ka long ba lada leit sha kitei ki jaka ym don surok satia, lait noh ka surok ba leit kit dieng bad kit rnga ki trok na ki khaw kiba don baroh ar liang ka wah Rwiang haduh katei ka jaka ba don ka kshaid Thupthup bad ka thwei Koh Langheit. Lada ïaid da ka kjat na jingkieng Rwiang kaba don ha ka surok bah National Highway 44 (E) Shillong Tura, ka shim por shikynta shiteng haduh ar kynta tang haduh ka kshaid Thupthup bad Kshaid haduh ka thwei koh Langheit ka dang shim por kumba khatsan minit ei ei.
Ka don kawei pat ka lynti na ka shnong Mawsiangbah kaba shim por kumba shi kynta ei ei kat kum ka jingïathuh jong ki briew na ka shnong Mawsiangbah bad kaba kham suk ruh ban ïaid, namar ha ka por tlang ki kali ki lah ban poi haduh ka shnong Mawsiangbah tangba lada ki bym pat ju leit ki shem jingeh.
Ha kaba ïadei bad kiba kum kitei ki jaka kiba itynnad, ka sorkar ka la dei ban pynkhlaiñ ïa ka tnad jngoh kai bad ba kan shimkhia ban pynpoi surok, khnang ba ki nongshang suwari kin ïoh ban leit bad kan long ruh kum ka lad ban kyntiew ïa ka ïoh kam ïoh jam bad kamai kajih ka ïoh ka kot jong ki paidbah ka West Khasi Hills baroh kawei.
