U Amit Gupta u don ha ka thup ‘Not Eligible’ hynrei la thung kum u Dy Registrar: NEHUSU

Shillong, Naiwieng, 06: Ka jingïakhih jong ki samla pule ka skulbah NEHU kiba don hapoh ka shatri jong ka North Eastern Hill University Students Union (NEHUSU) ban dawa weng kam ïa u Registrar u Col. (Retd) Omkar Singh bad ïa u Deputy Registrar (Academics) u Amit Gupta ka la nang khluit shuh shuh da ka jingkyrshan jong ki samla pule ka skulbah NEHU ka Tura Campus.
Ha kane ka jingïakhih ki samla pule ha Tura ki la ai jingkyrshan ïa ka jingdawa jong ka Union ba dei ban wengkam mardor ïa u Registrar bad ïa u Deputy Registrar (Academics) halor ka nongrim ba kim pat long kiba bit ban pynïaid ïa ki kam ophis hapoh kane ka skulbah kumba ki la lap ha kine ki khyndiat bnai baladep naduh ba la thungkam ïa ki.
Ha Shillong Campus, ki samla pule haduh mynta ki dang pynlong ïa ka jingïakhih da kaba shah thngan khlem pud sngi da ka jingkyrshan lang ka KSU NEHU Unit.
Ka NEHUSU ha ka sngi Balang ka la sei madan ruh ka jingthungkam ka skulbah North Eastern Hill University, Shillong ïa u Amit Gupta kum u Deputy Registrar.
Ka Union ka la sei madan ruh ïa ka Notice ba la pynmih ha ka 13 tarik Ïaiong, 2023 ba la soi da u Registrar (incharge) u Prof. AS Dixit kaba ïadei bad ka jingpyni ïa ki briew kiba aplai ïa ka post Deputy Registrar ki don tang 44 ngut kiba ibit ban shah jied ban shimti kane ka kam katba u Amit Gupta u don ha ka kyrdan kaba 147 bad u la shah pynngat ha ka thup “not eligible’ ne u bym ibit ban shah jied ban shimti ïa kane ka kam.
Ki nongïalam jong ka NEHUSU ki la buh jingkylli ruh ïa ki bor pynïaid jong ka skulbah NEHU da kaba ong, “kumno u Amit Gupta uba la shah kyntait bad shah pynngat ha ka thup “Not Eligible” u la shah jied ban shimti kum u Deputy Registrar hapoh kane ka skulbah.”
Ïa ka jingbym botbor jong u ban trei ïa kam, la lap na ka shithi kaba u la soi ha ka 16 tarik Risaw, 2024 ïa kaba u la phah sha baroh ki Head jong ki Department ka skulbah NEHU ha kaba ka jingthoh jong u ïa ka ktien phareng ka la long thik kumba thoh u khynnah uba dang leit skul ym kat ka kyrdan jong u ophisar uba la bat ïa ka kyrdan ophisar kaba la pynlehraiñ haduh katta katta wat ïa ki nonghikai bad ïa ki samla pule jong ka skulbah NEHU.