Thoh ka NEHUSU sha ka President ka ri ban weng kam ïa u VC, Registrar, Dy. Registrar

Shillong, Naiwieng, 06: Ka North Eastern Hill University Students Union (NEHUSU) ha ka sngi Balang ka la pynher da ka jingthoh sha ka President ka ri India ka Droupadi Murmu kaba dei ruh ka Visitor jong ka skulbah NEHU ban dawa weng kam noh mardor ïa u Vice Chancellor, u Registrar bad ïa ki Deputy Registrar kynthup ruh ïa ki nonghikai bad ïa ki nongtrei hapoh kane ka skulbah ki bym larkam.
Ha kane ka shithi jingujor ba la soi da ki nongïalam ka NEHUSU bad ka KSU NEHU Unit ki la pynpaw ba ka jinglong jingman jong ka skulbah NEHU hapoh ka jingïalam jong u Vice Chancellor u Prof. Prabhakar Shankar Shukla bad u Registrar u Col (Retd) Omkar Singh ka la poi haduh pud bym lah shuh ban ïada, bad ki jingma kiba ap ïa ka pule pule, ki jingtei bad ka nam jong ka shlem pule.
“Ka jinghiar kyrdan jong ka skulbah ka pynpaw shai ïa ka jingbym lah jong ki bor dei khmih (Administration) ban pyndep ïa ki kamram ba kongsan jong ka. Shuwa ban thung ïa u Prof. P. S Shukla kum u Vice-Chancellor, ka NEHU ka la don ha ka kyrdan ba hakhmat eh jong ki 60 tylli ki skulbah ha ka ri. Hynrei hapoh ka jingïalam jong u, ka kyrdan jong ka skulbah ka la hiar arsut sha ka kyrdan kaba hapdeng 100-150, tang hapoh lai snem. Kane ka jinghiar ha ka jingtreikam ka long ka daw kaba kyrkieh ba dei ban pynbeit noh mardor,” la ong ka NEHUSU bad ka KSU NEHU Unit.
Kine ki ar tylli ki kynhun ki la kren diaw ruh ïa ki jingbym sngap jong u Vice Chancellor ban pynurlong ïa ki jingdawa.
Haba kdew ïa ki jingbym lah ban pynurlong ïa ki jingdawa, kine ki ar kynhun ki la kdew ïa ka jingduna ki Hostel, ka jingbym biang ki Laboratory, ka jingduna nongtrei ban pyntyllun ïa ka pule ka puthi bad ïa ki kam shakri ha ki ophis. “Wat haba ki post baladep mang ki sah thylli, hynrei u Vice Chancellor um shym la pyndap satia ha ka por kaba biang,” ong ka shithi ujor.
“U Vice chancellor u la pynbna ar sien kynthih ïa ka jingthungkam naduh ba u la shimti kam hapoh ka skulbah ban pyndap ïa ki post kiba thylli, da kaba pyndam pat khlem kano kano ka jingpynshai kaba dei, kane ka la wanrah ïa ka jingduh jingkyrmen bad ka jingbitar ïa kiba nongthep kam. Kane ka rukom leh ka la ktah ïa ka rukom thungkam bad pynsniewdur ïa ka jingpawnam ka skulbah,” la ong kine ki ar kynhun.
“U Vice Chancellor um shym la lah ban pyntyllun ïa ka jingïaid beit ïaid ryntih ka pule ka puthi jong ka skulbah bad ïa ki kam ba ïadei bad ka ophis, naduh ka jingpynlong ïa ki jingïalang Academic Council, kiba la shah pynthud bad pynsangeh noh hapoh ka jingïalam jong u. Kane ka la pynpaw ïa ka jingbym lah jong u ban ïalam ïa ka skulbah ha ka rukom kaba dei,” la kynnoh kine ki ar kynhun.
Ka NEHUSU bad ka KSU NEHU Unit ki la ïai ban ruh ba ka jingthungkam ïa u Col (Retd) Omkar Singh kum u Registrar ka long kaba buh ïa dak jingkylli uba heh.
“Ka jingthungkam ïa u Amit Gupta kum u Deputy Registrar (Academics) ka la wanrah ïa ka jingbym khuid ka thungkam thungjam hapoh ka skulbah. U Gupta um shym la long uba bit ha ka por ba la jied ïa ki nongaplai kam ha u snem 2022 namar ka jingbym pat don jingtip eiei ïa ki kam pynïaid ophis hynrei hadien la thungkam pynban kum u Deputy Registrar ha u snenm 2024.
Kine ki ar kynhun ki la kdew ruh ïa ka rai jong u Vice Chancellor ban thungkam ïa ki riewshimet kiba la dei ka rta shongthait bad ka jingthungkam ïa u Officer on Special Duty na ka bynta u Director of College Development Council (CDC) bad ïa u Guest House Incharge bad kynthup ruh ka jingpep trei khah khah jong u Vice Chancellor kaba ktah ïa ka jingtreikam jong ka skulbah ha kiba bun ki khep.
“Wat hapdeng ki jingkyrpad, u VC um shym la thung ïa ki Pro Vice Chancellor ha Shillong bad ha Tura Campus kaba la pyndkoh ïa ka jingtreikam,” ki la bynrap.