Kem lang ïa ki Dalal kiba ïarap ban pynrung beaiñ, dawa ka KSU na u DC

Mawkyrwat, ‘Naiwieng 06: Ka Khasi Students’ Union jong ka South West Khasi Hills District, ha ka sngi Balang ka la leit ban ïa kynduh ïa u Deputy Commissioner jong ka South West Khasi Hills District hadien ba ka la lap ïa ka jingdon ki nong Bangladesh kiba wan rung be-aiñ sha ki jaka jong ka ri India ha shilynter u khappud India-Bangladesh jong ka South West Khasi Hills District.
Kane ka jingdawa jong ka KSU na u Deputy Commissioner, South West Khasi Hills District ka dei hadien ba ka KSU Langkynma Area Unit hapoh ka jingïalam jong u President Bah Ioanis Hashah ka la ioh ban bat haduh 12 ngut ki nong Bangladesh kiba wan kiew sha South West Khasi Hills ha ka step sngi Balang.
Na ka liang ka Seng ka la kynthoh ruh ïa ka jingbym treikam jong ki shipai BSF bad ka jingbym shimkhia jong ki ïa ki kam kum bor pahara jong ka sorkar pdeng kiba dei peit ban pahara ïa u pud u sam jong ka ri India.
Ka seng ka dawa ruh ba ki bor pahara khappud (BSF) kin dei ki shipai pahara khappud ba kongsan jong ka ri India bad ban pyndep ïa ki kamram jong ki kumba la pynkhamti ha ki ban ïada ïa ki khappud jong ka ri bad ka ri Bangladesh ha South West Khasi Hills District.
“Ki BSF ki dei ban pynleit jingmut ha kaba pynjur ïa ka jingpeitngor ha ki jaka khappud ym ban pynshitom ïa ki nongshong shnong ha ki surok bah,” ong utei u nongïalam ka KSU.
Shuh shuh ka seng ka ong ruh ba ka jingbat ia ki briew kiba wan rung beaiñ na kawei pat ka ri kan long beit ïa baroh lada lap ïano ïano ruh.
Na ka liang ka seng ka ong ruh ba ki tip ia ka jingdon ki dalal (ki nongkhaïi) kiba pynsuk ïa ka jingwan rung beaiñ jong ki nongwan buhai shnong na Bangladesh lyngba ki bynta ba la pynjulor ne bym don jingker ha khappud. Kumta, ka la kyntu ïa ki bor pynïaid District bad ki pulit ba kin leh ïa ka jingtohkit kaba bniah, bad kino kino ki briew kiba donkti ban ïarap ïa ki briew kiba wan rung be-aiñ sha India kin shah kem bad shah pynshitom katkum ki kyndon jong ki aiñ.
Ka KSU ka la kyntu ïa ka ophis jong u DC, South West Khasi Hills District ba ka dei ban pynlong ïa ka jingïalang bad ki BSF, ki seng bhalang, bad ki Khlieh Nongsynshar Shnong jong baroh ki shnong kiba don hapoh ka jingjngai kaba 10 km na khappud khnang ban tehlakam ïa kane ka jingma bad ban khanglad ïa kano kano ka jingpyrshang ban wan rung be-aiñ hadien ha bud.